Türkiyede yaşağan qırımtatarlar, Qırımda bir kişilik piketlerde iştirak etkenleriniñ cöremelerini tölemek içün paranı toplav boyunca «Qırım marafon» tedbirine qol tuttılar.
Bunı yanvarniñ 2-sinde özüniñ Facebooktaki saifesinde «Qırım birdemligi» cemiyet teşkilâtı bildire.
Bu cümleden, Qırım faaliyetçileriniñ cöremelerini tölemek içün paranı Türkiyeniñ Gebze şeerinde topladılar.
2017 senesi dekabrniñ 23-nde «Qırım birdemligi» cemiyet birleşmeniñ faaliyetçileri yañı «Qırım marafonı» çerçivesinde memuriy cöremelerniñ tölenmesi içün paranıñ toplanmasını ilân ettiler.
Qırımda oktâbrniñ 14-nde, Rusiye tarafından ilhaq etilgen yarımadada telükesizlik hadimleriniñ qırımtatarlarğa, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi. Daa soñra Rusiye mahkemeleri tarafından bu piketlerniñ iştirakçilerine cöremeler tayin etildi.
Daa evel «Qırım birdemligi», qırımtatar faaliyetçilerine qarşı cöremeler tayin etken mahkemelerniñ yanında cöremelerni tölemek içün 10 rublelik qıymetinde maden paralarnıñ toplanmağa başlağanını bildirdi.
Tedbir teşkilâtçılarınıñ niyetine köre, «pervasız olmağanlarnıñ birdemligi»ni köstermek içün paralarnı 10 ruble (qararnen 4 hrivna – QA) qıymetinde maden aqçalar ile toplaylar.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
