Qırımtatar yırcısı Camala, yılnıñ yekünlerini çekerek, o, onıñ içün ömürinde eñ bahtlı yıllardan biri olğanını qayd etti. Bunı artist hanım, özüniñ Facebooktaki saifesinde yazdı.
Yırcı: «Bir çoq kişi, 2017 senesi ağır edi, dey. Mence, adamlar yahşı şeylerni pek tez unuta ve menfiy şeylerge oqtalalar. Lâkin ayatımızda yahşı ve yaman şeyler er vaqıt bir-birine teñ kele. 2017 senesi menim içün eñ bahtlı yıllardan biri edi», – dep yazdı.
Camala, keçken senede em onıñ şahsiy ayatında, em de icadında bir çoq muim adiselerniñ olıp keçkenini bildirdi. Esas adiseler aqqında söz yürsetkende, Sport sarayında yapılğan büyük solo kontserti, Ukrainada «Eurovision»nıñ ötkerilmesi, eki yañı singlınıñ çıqqanını qayd etti.
Ondan ğayrı yırcı «Ülkeniñ sesi» yarışında akemlik tecribesi qazanğanını ve süt beziniñ kanserine diqqatnı çekmek maqsadınen teşkil etilgen «Özüñe muqayt olacağıña söz ber» içtimaiy programında iştirak etkenini hatırladı.
