Link açıqlığı

Muvaqqat izolâtorda aşalav aqqında haberler alınğan soñ cemaatçılar «Hizb ut-Tahrir işi» figurantı Siruknı ziyaret ettiler – advokat


«Yaltadaki Hizb ut-Tahrir işi» boyunca tevqif etilgen Vadim Siruknı Krasnodar muvaqqat izolâtorında aşalağanları aqqında haber alınğan soñ Cemiyet közetüv komissiyasınıñ (CKK) azaları onı ziyaret etti. Bunı dekabrniñ 29-nda Facebooktarki saifesinde Rusiye advokatı Aleksandr Popkov bildirdi.

Popkov: «O (Siruk – QA) bir yoruq, beden travmaları yoq, sağlığı yerinde. Vadimni ne içündir etaptan alıp, ağızlıqlı köpekler ile umumiy tintüv şeklinde «plan boyunca yapılğan» mahsus tedbirler ötkerdiler. «Qaba davranğan» saqçı ile bir adise sudur oldı. Vadimden elektroustra ve namazlıqnı tutıp aldılar. Olarğa ruhset yoq emiş. Lâkin soñundan qaytaracaqlar. Şimdi bütün malümat bu», – dep bildirdi.

Onıñ aytqanına köre, «Yaltadaki Hizb ut-Tahrir işi»niñ ekinci figurantı Emir-Useyin Kuku «endi ğaliba Rostovda, onı da CKK ziyaret etecek».

Daa evel Popkov Qırım.Aqiqatqa, Krasnodar ve Rostov cemiyet közetüv komissiyalarına (CKK) apis yerlerinde «Yaltadaki Hizb ut-Tahrir işi» figurantları Emir-Useyin Kuku ve Vadim Siruknı ziyaret etmek ricasınen muracaat etkenini bildirdi.

Dekabrniñ 4-nde Aqmescitte Rostov okrugınıñ arbiy mahkemesi seyyar oturışuvında «Yaltadaki Hizb ut-Tahrir işi»niñ figurantları Muslim Aliyev, Emir-Useyin Kuku, Vadim Siruk, Enver Bekirov, Refat Alimov ve Arsen Cepparovnıñ apis muddetini 2018 senesi mayısnıñ 27-sine qadar uzattı.

«Yalta altılığı»nıñ işi boyunca tahqiqat bitirildi. Qabaatlanğanlarnı Rostov-na-Donu şeerine yollaylar.

Yaltadaki «Hizb ut-Tahrir (Rusiye ve onıñ tarafından ilhaq etilgen Qırımda yasaq etilgen teşkilât) işi»niñ fiqurantları Arsen Cepparov ve Refat Alimov 2016 senesi aprelniñ 18-nde Qızıltaşta (Krasnokamenkada) tevqif etilgen soñ apiste bulunalar. Bu iş boyunca qabaatlanğanlarnıñ ilk dörtü 2016 senesi fevralniñ 11-nde tevqif etildi. Bular: İnsan aqları boyunca alâqa grubunıñ azası Emir-Useyin Kuku, qurucılar olıp çalışqan Aluşta sakini Muslim Aliyev ile Qızıltaş köyüniñ sakini Enver Bekirov ve Yaltada yaşağan çeçek satıcısı Vadim Siruk.

«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi din alâmetine köre yapıla, dep sayalar. Advokat Emil Kurbedinov, Rusiye uquqqoruyıcı organları tarafından bu iş boyunca esas olaraq qırımtatarlar taqip etilip, olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruplarğa ait Qırım sakinleriniñ de taqip etilgenini qayd ete.

Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.

XS
SM
MD
LG