Link açıqlığı

Saatnıñ esas haberi

Rusiye telükesizlik hadimleri, Aluştada gaz yoluna zarar ketirilgeni içün Aqmescitte tintüv yaptılar – ev bikesi


Gaz yolunıñ zarar körgen yolağı, Qastel (Vinogradnoye), Qırım, 2017 senesi noyabr 1 künü
Gaz yolunıñ zarar körgen yolağı, Qastel (Vinogradnoye), Qırım, 2017 senesi noyabr 1 künü

Rusiye telükesizlik hadimleri, oktâbrniñ 31-nde Aluştada gaz yolu zarar körgen içün Aqmescitte mektep psihologı Asene Misiratovanıñ evine tintüv etmek içün keldiler.

Bunı Misiratova tintüvden soñ «Qırım birdemlik» cemiyet birleşmesi içün bergen izaatta ikâye etti.

Tintüv etilgen evniñ bikesi: «Qapını qaqtı, balalarnı zalğa alıp ketmekni ve bütün vesiqalar, telefon ve kompyuterni bermekni rica ettiler. Bütün bularnı tetqiq etti, baqtılar. Soñ nasıldır protokol tizdi ve tintüv etip başladılar», – dep bildirdi.

Onıñ aytqanına köre, telükesizlik hadimleri, Aluştada gaz yolunıñ patlağanı içün tintüv etmege keldiler.

«Sabıq aqayı ve ağası» aqqında soraştırılğan Misiratova: «Tabiiy ki, men, bu hususta bir şey bilmegenimizni ayttım», – dep ilâve etti.

O, telükesizlik hadimleriniñ bir şey tapmağan ve alıp ketmegenlerini qayd etti.

Daa evel, dekabr 26, salı künü Aqmescitte Rusiye telükesizlik hadimleriniñ Darvin ve Hayri Emir-zade soqaqlarında tintüv etmeleri belli oldı. Darvin soqağındaki tintüvden soñ telükesizlik hadimleri bir qadınnı alıp ketti.

Noyabrniñ 1-nde Rusiyede Aluştadaki gaz yolunıñ zarar körgeni ve neticede Qırımnıñ Cenübiy yalı boyunda biñden ziyade sakinniñ gazsız qalğanı aqqında haber berildi. Aynı zamanda eki yüksek voltli elektrik yolaq: «Angara (Perevalnoye) – Aluşta» ve «Aluşta – Temirçi (Luçistoye)» elektrik yolaqlarında tehnologik bozuluvlar oldı.

Daa soñra Rusiyege tabi Qırım yolbaşçısı Sergey Aksönov, ilhaq etilgen Qırımnıñ energetik kompleksi Cenübiy yalıdaki gaz yolu ve yüksek voltli elektrik yolaqlarınıñ bozulğanlarından 7,54 million ruble (qararnen 3,36 million hrivna – QA) miqdarında zarar körgi, dedi.

Rusiye FSBsiniñ ilhaq etilgen Qırım boyunca tahqiqat bölügi yarımadada gaz yolu ve yüksek voltli elektrik yolaqlarınıñ zararlanğanlarını «diversiya» olaraq tahqiq ete.

Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.

XS
SM
MD
LG