Qırımtatar faaliyetçisi, «Veciye Kaşka işi» figurantı Asan Çapuh, keçirgen insultından soñ ağır bir sağlıq vaziyetinde buluna. Bunı tünevin faaliyetçi Zair Smedlâyev Facebookta bildirdi.
Smedlâyev: «İç bir tıbbiy muayene ve tedaviylev yapılmay. Ondan ğayrı, onda sol qolu ve ayağınıñ areketleri sıñırlı. Eger oña ileride de böyle munasebet kösterilse, o, açlıq ilân etmek niyetindedir!» – dep bildirdi.
Bu malümatnı jurnalist Anton Naumlük de tasdiqlay.
Onıñ malümatına köre, Çapuhnı diagnostika içün hastahanege yollav aqqında yazılı buyurıq endi üç künden berli eda etilmey.
65 yaşlı Asan Çapuh muvaqqat izolâtorda mikroinsult keçirdi ve acele surette hastahanege yatqızılmaq kerek. Onıñ advokatı Ayder Azamatov, imayesi altında bulunğannıñ şeer hastahanesine keçirilmesini talap ete edi.
Noyabrniñ 23-nde kündüz Aqmescitte telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olar Türkiye vatandaşından «aqsız yerde hususan büyük miqdarda para talap etüv»de qabaatlanalar. Rusiye telükesizlik hadimleri tarafından yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadınnıñ vefat etkeni belli oldı.
Noyabrniñ 24-nde Rusiyeniñ kontroli altında bulunğan Aqmescitteki Kyiv rayonı mahkemesi yaqalanğan qırımtatar faaliyetçilerini 2018 senesi yanvarniñ 15-ne qadar apiste qaldırdı.
