Link açıqlığı

Saatnıñ esas haberi

Rusiye: Peterburgda faaliyetçiler «Qırımtatarlar terroristler degil» plakatlarınen piketlerge çıqtılar (+video)


Dekabrniñ 18-nde aqşam Rusiyeniñ Sankt-Peterburg şeerinde «Strategiya-18» faaliyetçileri daa evel ilhaq etilgen yarımadada cöremeler ile cezalanğan qırımtatarlarğa qol tutmaq içün «Qırımtatarlar terroristler degil» plakatlarınen bir kişilik piketlerge çıqtılar. Bunı Azatlıq Radiosı bildire.

Faaliyetçilerden bir hanım: «Qırımda adamlar nasıl plakatlarnen çıqqan olsa, biz de aynı plakatlarnen çıqamız. Olar tamam bunı – terroristler olmağanlarını söylemege istegen qırımtatarlar edi… Bugün 70 kişini muhakeme ettiler. –Qırımda qanunlar işte böyle etip eda etile… Olarğa qarşı toqtamağan repressiyalar devam ete. Men olarnı (repressiyalarnı – QA) yalıñız bir manada añlayım – olarnı yarımadadan sıqıştırıp çıqarmaq isteyler», – dedi.

Dekabrniñ 18-nde Qırımda, daa evel tintüvler ve tevqiflerge cevaben bir kişilik piketlerge çıqqan qırımtatarlarğa qarşı 70-ke yaqın mahkeme oturışuvı ötkerildi.

Faaliyetçilerge qarşı, tayin etilgen piket ötkerüv tertibiniñ bozulması munasebeti ile (Rusiyeniñ Memuriy tertip bozuv aqqında kodeksi, madde 20.2, 5-nci qısım) memuriy protokollar tizildi. Olarğa 10 biñden 20 biñ rublege qadar (4700-den 9400 hrivnağa qadar – QA) cöreme ya da mecburiy iş cezası tayin etilmek mümkün. Tizilgen protokollarğa köre, polis hadimleri bir kişilik piketlerge, akimiyet ile uyğunlaştırılmağan kütleviy tedbir deye qıymet kestiler.

Mahkeme oturışuvları, cümleden, Aqmescit, Canköy, Aluşta, Suvdağ ve bunıñ kibi de İçki, İslâm-Terek, Qarasuvbazar ve Qurman rayonlarında ötkerildi. İçki işler nazirliginiñ Qırım boyunca ekspertiza merkezi tarafından «piketler bir maqsat, bir niyet ve umumiy teşkil etilüv ile birleştirileler» şeklinde çıqarılğan hulâsa, qabaatlav tarafınıñ esas delili olaraq qabul etildi.

Qırımda oktâbrniñ 14-nde, Rusiye tarafından ilhaq etilgen yarımadada telükesizlik hadimleriniñ qırımtatarlarğa, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi.

Rusiyeniñ muhalif faaliyetçileri muntazam surette siyasiy mabüslerni azat etmek, Rusiyeniñ Ukrainağa qarşı tecavüzini toqtatmaq, Qırımnıñ işğaline soñ qoymaq talaplarınen barışıqlı piketler ve tedbirlerge çıqalar.

Sankt-Peterburg ve Moskvanıñ faaliyetçileri, qırımtatarlarnıñ 1944 senesi mayıs 18-nde sürgün etilüvi hatırasına «Strategiya-18» dep adlandırılğan muddetsiz areket içün birleştiler. İlhaq etilgen Qırımdaki vaziyetni tanıtmaq, Rusiye cemaatçılığına insan aq-uquqları ve ürriyetleriniñ bozuluvı vaqiaları aqqında haber bermek içün faaliyetçiler er aynıñ 18-nci künü şeerniñ soqağına çıqalar.

XS
SM
MD
LG