Link açıqlığı

Telükesizlik hadimleri qırımtatar faaliyetçilerine cöremeler tayin etilgen mahkemelerniñ binaları yanına avtozaklar ketirip qoyalar


Qurman, mahkeme binası yanında avtozak, 2017 senesi dekabr 18 künü

Dekabrniñ 18-nde Rusiye telükesizlik hadimleri, oktâbrniñ 14-nde yarımadanıñ türlü bölgelerinde ötkerilgen bir kişilik piketlerniñ iştirakçilerine cöremeler tayin etüv boyunca oturışuvlar yapılğan mahkemeler yanına avtozaklarnı ketirip qoyalar.

Canköyde mahkeme binası yanında yüzge yaqın kişi, Qurmanda – onlarnen yerli sakinler toplandı. Ondan ğayrı, Suvdağ ve diger şeer ve qasabalarnıñ yerli sakinleri mahkeme binaları yanına keleler.

Yerli sakinler mahkeme binası yanında toplandı
Yerli sakinler mahkeme binası yanında toplandı

Kremlniñ kontroli altında bulunqan Aqmescitniñ Jeleznodorojnıy rayonı mahkemesinde Ali Muratovğa 10 biñ ruble (qararnen 4700 hrivna – QA) miqdarında cöreme tayin etildi. Kefede mahkeme qırımtatar faaliyetçileriniñ işi boyunca oturışuvnı dekabr 19, salı kününe keçirdi.

Advokat Edem Semedlâyevniñ fikrine köre, piket iştirakçilerini «yalıñız öz fikrini ifade etkenleri içün» muhakeme eteler.

Dekabrniñ 18-nde Qırımda, daa evel tintüvler ve tevqiflerge cevaben bir kişilik piketlerge çıqqan qırımtatarlarğa qarşı 70-ke yaqın mahkeme oturışuvı ötkerilmekte. Faaliyetçilerge qarşı, tayin etilgen piket ötkerüv tertibiniñ bozulması munasebeti ile (Rusiyeniñ Memuriy tertip bozuv aqqında kodeksi, madde 20.2, 5-nci qısım) memuriy protokollar tizildi.

Mahkeme oturışuvları, cümleden, Aqmescit, Canköy, Aluşta, Suvdağ ve bunıñ kibi de İçki, İslâm-Terek, Qarasuvbazar ve Qurman rayonlarında ötkerilmekte. İçki işler nazirliginiñ Qırım boyunca ekspertiza merkezi tarafından «piketler bir maqsat, bir niyet ve umumiy teşkil etilüv ile birleştirileler» şeklinde çıqarılğan hulâsa, qabaatlav tarafınıñ baş delili olaraq qabul etilmekte.

Qırımda oktâbrniñ 14-nde, Rusiye tarafından ilhaq etilgen yarımadada telükesizlik hadimleriniñ qırımtatarlarğa, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi.

Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.

XS
SM
MD
LG