Link açıqlığı

Saatnıñ esas haberi

Aksönov: Qırımda balalar bağçalarına nevbetler Rusiyeden kelgenler içün arta


Aqmescitte balalar bağçasına yazıluv içün nevbet, arhiv fotosı
Aqmescitte balalar bağçasına yazıluv içün nevbet, arhiv fotosı

Kreml tarafından tayin etilgen Qırım akimiyetiniñ yolbaşçısı Sergey Aksönov, yarımadada balalar bağçalarına nevbetlerniñ, cümleden, Rusiyeden kelgen aileler içün artqanlarını tasdiq etti.

Onıñ aytqanına köre, yarımadada 2014 senesinden soñ yañı balalar bağçalarınıñ qurulışı ve mevcüt olğanlarnıñ rekonstruktsiyası sayesinde balalar bağçalarında 14 biñ yañı yer meydanğa ketirildi. Faqat bu azlıq etti, çünki Qırımnıñ mektepten evelki muessiselerine nevbet arttı.

Aksönov Facebooktaki saifesinde: «Bu, mektepten evelki muessiselerni qurmaq planlarınıñ aqiqiyligine inanğan Qırım sakinleriniñ nevbetke turmaq qararınen alâqalıdır. Diger taraftan, Qırımğa Rusiyeniñ diger bölgelerinden qorantalar kele, ve olarnı da balalar bağçalarındaki yerler ile temin etmek kerek», – dep qayd etti.

Aksönov, nevbetniñ 2020 senesine qadar ğayıp etilecegini söyley. Bunıñ içün 17 biñ yeri olğan 87 balalar bağçasınıñ qurulması ve ondan ğayrı modulli balalar bağçaları sayesinde qoşumça daa 5,4 biñ yerniñ meydanğa ketirilmesi planlaştırıla.

Noyabrniñ soñunda Kremlniñ kontroli altında bulunğan Qırımnıñ tasil, ilim ve gençlik naziri Natalya Gonçarova, bala bağçalarına nevbetni ğayıp etmek içün 2,5 milliard rubleniñ (1,5 milliard hrivnanıñ) kerek olğanını bildirdi. Aynı zamanda o, bu miqdarnıñ da yeterli olmaycağını qayd etti.

Resmiy statistikağa köre, 2017 senesiniñ başında Qırımda 20 biñ bala mektepten evelki muessiselerge qabul etilmesini bekley edi.

XS
SM
MD
LG