Rusiye ilhaq etilgen Qırımnı öz vatandaşları ile kolonize etüv ve Ukraina vatandaşlarını sıqıştırıp çıqaruv siyeasetini ömürge keçire. Bunı dekabrniñ 12-sinde Kyivde ötkerilgen brifingde QMC prokurorı Gündüz Mamedov beyan etti.
«İşğalci akimiyet adamlarnı alıp qaçuv, eziyetlev, qanunlarnı retrospektiv tarzda qullanuv, Rusiye silâlı quvetlerine hizmetke mecburen aluv, mecburiy köçürüv, sürgün etüv, apis etilgen şahıslarnı Rusiye territoriyasına alıp ketüv kibi cinayetler işley. Rusiye vatandaşlarını ketirip kolonize ete», – dedi Mamedov.
Onıñ aytqanına köre, 2017 senesiniñ başında halq deputatı, qırımtatar halqınıñ lideri Mustafa Cemilevniñ muracaatından soñ QMC prokuraturası Ukraina Cinaiy kodeksiniñ 438-nci maddesi (cenkniñ qaideleri ve adetleriniñ bozuluvı) boyunca cinaiy işniñ çerçivesinde tahqiqat areketlerini başladı.
«Prokuratura, halqara humanitar uquqnıñ bozuluvı boyunca tahqiqat yapa. Yarımada işğal etilgen topraq olğanını ve, demek ki, bu yarımadanıñ sakinleri halqara humanitar uquqnıñ imayesi altında bulunğanlarını köz ögünde tutup, bütün faktlar ve bozulğan ceetlerni vesiqa şeklinde qayd ete.
Qırım Muhtar Cumhuriyeti Prokuraturası Halqara cinaiy mahkemesine Qırımdaki bozuluv faktları boyunca üç haberdar etici bildirüvni taqdim etti. Olarnıñ ekisi ilhaq etilgen yarımadada mal-mülk saipligi aq-uquqnıñ bozuluvı ile ve daa biri – Rusiye tarafından ilhaq etilgen topraqtan Ukraina vatandaşlarını zornen çıqaruv ile alâqalıdır.
Dekabrniñ 5-nde Gaaga Halqara cinaiy mahkemesiniñ kâtibligi, Ukrainada 2014 senesindeki vaqialarnıñ ilk tahqiqatınıñ neticeleri aqqında er yıllıq esabatnı ilân etip, Qırımnıñ ilhaq etilüvi esnasında Rusiye tarafından arbiy cinayetler işlengeniniñ alâmetlerini qayd etti.
