Bağçasarayda Rusiye telükesizlik hadimleri qırımtatar faaliyetçisi Rustem Osmanovnı yaqaladılar. Onı, ruhsetsiz ötkerilgen mitingde iştirak etkeninde qabaatlaylar, dep bildire Qırım.Aqiqat muhbiri.
Saba, üstlerinde tanıtıcı belgileri olmağan adamlar Osmanovnı evden alıp kettiler. Daa soñra onıñ, Bağçasaray Rayon içki işler bölüginde bulunğanı belli oldı.
Mahkeme oturışuvı dekabrniñ 11-ne tayin etildi, dep bildirile.
Yaqalanğannıñ anası bildirgeni kibi, Rustem Osmanovnen beraber bölükke babası ketti.
Rusiye tarafından ilhaqından soñra Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
