Ukraina prezidenti Petro Poroşenko Halqara insan aqları künü munasebeti ile «cinayetkâr Rusiye tecavuzı işğal etilgen Qırımda ve Donbassta ayatlarını saqatlamağa devam ete», dedi.
Dekabrniñ 10-nda bu hususta Poroşenkonıñ Facebooktaki resmiy saifesi haber bere.
«Eminim ki, halqara birligi ve Ukraina ile birdemligi ve halqara uquqnıñ küçü sayesinde Kremlniñ bu (cinaiy – QA) niyetleri mağlübiyetke mahkümler, çünki yapılğan cinayetler içün mesuliyetten qaçınmaq mümkün degil», – dep yazdı Ukraina prezidenti.
Açıq menbalarda bu beyanat boyunca Rusiye tarafından berilgen izaatlar şimdilik yoq.
Human Rihgts Watch Halqara aq-uquq qoruyıcı teşkilâtı daa evel, ilhaq etilgen Qırımda Rusiye akimiyeti yarımadada başqaca tüşüngenlerni bütünley bastırmaq içün türlü sıltavlar ile qırımtatarlanıñ taqiplerini daa sert şekilde yapıp başlağanını bildirdi.
Aq-uquq qoruyıcılarınıñ esabatında, 2014 senesi martından başlap yarımadada «Rusiye akimiyeti ve olarnıñ işanılğan adamları qırımtatar halqı vekilleri ve olarnıñ tarafdarlarını ve bu cümleden jurnalistler, blogerler, faaliyetçiler ve diger adamlarnı taqip etüv, qorqutuv, mecburiy ve qanunsız tintüvler, cismaniy ucumlarğa oğratalar», denile.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
