AQŞ prezidenti Donald Tramp, Qudüsni İsrailniñ paytahtı olaraq tanığanını ilân etken soñ İsrail tarafından işğal etilgen Filistin topraqlarında üç künden berli ardı-sıra filistinliler ile İsrail telükesizlik hadimleri arasında çatışmalar devam ete.
İsrail ordusınıñ bildirgenine köre, Ğarbiy Şeria (Ürdünniñ Ğarbiy saili) ve Ğazze Şeritiniñ (Ğazze sektorınıñ) qararnen 20 yerinde «qızğın çatışmalar» başlandı. Numayışçılar telükesizlik hadimlerine taşlar ve «Molotov kokteylleri»ni attılar. Arbiy hadimler «numayışçılarnı dağıtuv vastaları» ile cevap berdiler. Bu adiselerniñ neticesinde üç filistinli yengil derecede yaralandı.
Ğazze Şeritinde çatışmalar, dekabrniñ 8-nde İsrailni Filistin territoriyalarından ayırğan qoranıñ yanındaki çatışmalarda elâk etken eki kişiniñ cenazesinde başlandılar.
Bu çatışmada filistinlilerge cıllı bir şekilde qol tutqan Türkiye, İsrail tarafından narazılıqlarğa cevap olaraq «adden aşırı ve nisbetsiz derecede» quvvet vastalarınıñ qullanılğanını taqbih etti.
Filistin milliy memuriyetiniñ prezidenti Mahmud Abbas, AQŞ prezidenti muavini Mayk Pens ile, onıñ İsrail ziyareti esnasında planlaştırılğan körüşüvini lâğu etkenini bildirdi. Mayk Pens ile körüşüvden vazgeçkenini Mısırda hristian Qıbt ortodoks kilsesiniñ başlığı olğan papa II Tavadros da ilân etti.
Dekabrniñ 6-nda Donald Tramp AQŞnıñ Qudüske qarşı eski siyasetiniñ deñişkenini ilân etip, filistinliler ile olarnıñ arap ittfaqdaşlarınıñ azabını qozğattı ve Ğarpta keskin tenqitniñ nişanı oldı. Buña qarşı Mahmud Abbas, bu adım AQŞnıñ Yaqın Şarqtaki barışıqlı aracı rolüni soñuna irdirdi, dedi.
Qudüsniñ statusı, İsrail-Filistin çatışmasınıñ er bir tarafı içün tesirli meseledir. Filistinliler Şarqiy Qudüsni, ileride qurulacaq devletleriniñ paytahtı olmaq kerek, dep sayalar.
