Link açıqlığı

Saatnıñ esas haberi

Umerov ve Çiygoz Venada, Qırımda insan aqlarınıñ bozuluvı aqqında ikâye ettiler


İlmi Umerov Venadaki keñeşte Qırımda insan aqlarınıñ bozuluvı aqqında ikâye ete, 2017 senesi dekabr 9 künü
İlmi Umerov Venadaki keñeşte Qırımda insan aqlarınıñ bozuluvı aqqında ikâye ete, 2017 senesi dekabr 9 künü

Qırımtatar Milliy Meclisi muavinleri Ahtem Çiygoz ve İlmi Umerov Venada Ukraina Tış işleri nazirligi tarafından teşkil etilgen keñeşte Rusiye tarafından ilhaq etilgen Qırımda insan aqlarınıñ bozuluvı aqqında ikâye ettiler. İlmi Umerov bunı Facebookta bildirdi.

Rusiye tarafından ilhaq etilgen ve Ukrainağa ait olğan Qırımdaki vaziyet, insan aqları ve ürriyetleri saasındaki vaziyet aqqında; tecavuzkâr devletke siyasiy ve iqtisadiy tazyıqnı arttırmaq kerekligi aqqında; Ukrainanıñ topraq bütünligi oğrundaki küreş aqqında ikâye ettik», – dep bildirdi Umerov.

Meclis reisi muavininiñ aytqanına köre, körüşüvde Avropada telükesizlik ve işbirligi teşkilâtı (OSCE) azaları olğan 15 Avropa Birligi devletiniñ vekilleri bar edi.

«Keñeş iştirakçileri Ukrainağa qol tutqanlarını ve ilhaq etilgen Qırımnı azat etmek ile Ukrainanıñ topraq bütünligini tiklemek içün bütün imkânlarnı qullanmağa azır olğanlarını ifade ettiler», – dep yazdı o.

Qırımtatar Milliy Meclisi reisi Refat Çubarov dekabrniñ 7-nde Ahtem Çiygoz ve İlmi Umerovnıñ OSCE azası olğan ülkeleriniñ nazirleri ve em de AQŞ devlet kâtibi Reks Tillerson ile körüşmek içün Venağa uçqanlarını bildirdi.

Ukraina Tış işleri naziri Pavel Klimkin Venada OSCE Nazirler Şurasınıñ oturışuvında Qırımdaki vaziyet içün cümleden yañı sanktsiyalar qabul etilmesi yolunen Rusiyege tazyıqnı arttırmağa davet etti.

Tış işleri nazirliginiñ sözcüsi Maryana Betsa, Klimkinniñ sözlerine esaslanıp, AQŞ, Kanada, İsveç (Şvetsiya), Türkiye, Litva, Latviya, Poloniya, Romaniya, Estoniya, Norvegiya ve Daniyanıñ «Rusiyege tazyıqnı arttırmağa» razı olğanlarını bildirdi.

XS
SM
MD
LG