Qırım aq-uquq qoruyıcıları grubunıñ (QAQG) mutehassısları tarafından yapılğan tetqiqatta, 2014 senesinde Qırım Rusiye tarafından işğal etilgen soñ siyasiy sebeplerden dolayı açılğan cinaiy işler çerçivesinde eñ az 70 kişi qanunsız olaraq azatlıqtan marum etildi, denile.
Mutehassıslarnıñ malümatına köre, 2014 senesiniñ ekinci çeriginde «siyasiy sebepten» açılğan işler boyunca parmaqlıqlar artına 5 kişi tüşken olsa, 2017 senesiniñ dörtünci çeriginde bu raqam 11 qat artıp, 55 kişini teşkil etti.
Aq-uquq qoruyıcıları, bugün 52 kişiniñ Qırım ve Rusiyeniñ apishaneleri ve muvaqqat izolâtorlarında apis etilgenini, üç kişiniñ ev apisinde bulunğanını ve, Qırımda siyasiy sebeplerden açılması tasdiqlana bilecek diger cinaiy işler olğanı içün bu, soñ raqam olmağanını, qayd ettiler.
QAQG mutehassısı Olga Skrıpnıknıñ fikrine köre, Ukraina akimiyeti ve parlamenti, siyasiy taqiplerniñ qurbanlarına ve olarnıñ ailelerine yardım aqqında qanunnıñ eñ qısqa vaqıt içinde qabul etilmesi içün qollarından ne kelse, er şeyni yapmaq kerekler. Bu adamlarnıñ problemlerinden bir qısmını al ete bilecek qanunnıñ leyhası endi işlep çıqıldı ve qayd etildi. Şimdiki basamaqta o, Ukraina Yuqarı Radasınıñ İnsan aqları, milliy azlıqlar ve milletlerara munasebetleri meseleleri boyunca komitetinde işlep bitirilmek kerek. Bundan soñ qanun leyhası rey berüvge qoyulıp, deputatlarnıñ çoqusı oña rey bermek kerek olacaq. Ondan ğayrı Ukrainanıñ 2018 senesindeki büdjetinde, böyle qanunnıñ amelge keçirilmesi içün munasip paralar ayırılmaq kerekler.
«Rusiye Federatsiyası akimiyet organlarınıñ qararınen siyasiy sebeplerden dolayı şahsiy azatlıqtan marum etilgen şahıslarnı siyasiy mabüsler olaraq tanuv ve olarğa devlet tarafından içtimaiy yardım etüv aqqında» qanun leyhası qabul etilse, Ukrainada 60 qadar kişi siyasiy mabüs olaraq tanıla bilecek. Olarnıñ arasında Qırımda tevqif etilgen ve cezasını qomşu Rusiyede ifa etken Qırım sakinleri de bar.
