Dekabrniñ 9-nda Aqmescitte 97 yaşında II Cihan cenki veteranı, Aqyar mudafaasınıñ iştirakçisi, sürgünlikni başından keçirip tarihiy Vatanına qaytqan qırımtatar qadını Hatice İslâmova vefat etti. Bu haberni onıñ soyu, Qırımtatar Milli Meclisiniñ azası Gayana Yüksel Facebookta bildirdi.
Hatice İslâmova 1919 senesi dekabrniñ 13-nde Aqmescitte doğdı. Bu şeerde onıñ balalığı ve gençligi keçti. 13-nci mektepniñ 7-nci sınıfnı bitirgen soñ, daa soñra Keriçke avuştırılğan Bağçasaraydaki tıbbiyet tehnikumına oqumağa kirdi. 1940 senesinde onı Aqyardaki 201 nomeralı deñiz zavodınıñ şimaliy dokunda feldşer noqtasınıñ müdiresi vazifesinde çalışmağa yolladılar.
Hatice İslâmova Aqyar mudafaasınıñ birinci kününden başlap tıbbiy hizmet leytenantı unvanı ile Qara deñiz flotunıñ deñiz piyadeleri saflarında cenkleşti. Aqyarnıñ 250 künlük mudafaası esnasında Hatice hanım yaralanğan askerlerge tıbbiy yardım köstere edi.
«Buña rağmen 1944 senesi mayısnıñ 18-nde, qaraman qadınnıñ bütün yararlıqlarına baqmadan, Hatice İslâmovanı da bütün qırımtatarlarnı kibi Qırımdan sürgün ettiler. Sadece qırımtatar olğanı içün. Sürgünlikte o, 40 yıldan ziyade Samarqand tıbbiyet institutı yanındaki Cumhuriyet hastahanesinde feldşer-ebanay olıp çalıştı. 1989 senesinde o, Qırımğa qaytmağa çaresini tapıp, başta Aqyarda ve 1993 senesinden başlap Aqmescitte yaşadı», – dep yazdı Yüksel.
Hatice İslâmova köstergen cesareti içün 2-nci derece Vatan cenki ve «Bohdan Hmelnitskiy» nişanları ile «Cesaret içün», «Aqyarnıñ mudafaası içün», Daşa Sevastopolskayanıñ doğmasına 150 yıl toluvı munasebeti ile çıqarılğan ve diger medallerinen mükâfatlanğan edi.
«Hatice apte İslâmovanıñ qaramanlıqlar tarihı ve taqdiri, qırımtatar halqınıñ XX asırdaki şanlı ve aynı zamanda facialı tarihınıñ daa bir misalidir. Bu halq, bir taraftan, II Cihan cenki vaqtında cebhede qaramanca cenkleşti, amma diger taraftan, esassız ve toplu surette hainlikte qabaatlanıp, 1944 senesi mayıs 18-nde vatanından sürgün etildi», – ikâye etti Hatice aqqında onıñ soyu.
Hatice İslâmovanıñ cenazesi Aqmescitte dekabrniñ 9-nda qılınacaq.
