Link açıqlığı

Qırım: Aqmescitteki «Hizb ut-Tahrir işi» figurantınıñ apayına qarşı, mahkeme icracılarına boysunmağanı içün protokol tizildi


Qırımnıñ Yuqarı mahkemesi, mahkeme binasına yiberilmegen «Hizb ut-Tahrir işi» figurantlarınıñ apayları akemge qarşı şikâyet yazalar

Kremlniñ kontroli altında bulunğan Qırım Yuqarı mahkemesinde dekabrniñ 8-nde mahkeme icracıları Aqmescitteki «Hizb ut-Tahrir işi» figurantı Uzair Abdullayevniñ apayını, mahkeme icracısına boysunmağanında qabaatladılar.

Qırım.Aqiqat muhbiri bildirgeni kibi, Fatma Abdullayeva mahkeme binasında ekinci qatnıñ meydançığında tura edi. Mahkeme icracıları, oturışuv qapalı rejimde keçkenine sıltap, qadınnı mahkeme koridorına yibermediler. Ondan soñ mahkeme icracıları, qadından mahkemeniñ birinci qatına inmesini talap ettiler. O, itirazlar bildirmege başlağanda, onı yaqaladı ve memuriy protokol tizmek içün alıp kettiler.

Fatma İsmailova mahkemede şikâyet yaza
Fatma İsmailova mahkemede şikâyet yaza

​Al-azırda Fatma Abdullaevağa qarşı, Rusiyeniñ memuriy tertip bozuvları kodeksiniñ 17.3 maddesi (akem ya da mahkeme icracısınıñ, tayin etilgen mahkeme çalışuvı tertibini temin etilmesine dair buyruğına boysunmama) boyunca protokol tizile. Bu maddede belgilengen tertip bozuluvı içün beş yüzden biñ rublege qadar cöreme ya da 15 küngece memuriy tevqif tayin etilgendir.

Faaliyetçilerniñ bir qısmı ve bu cümleden Aqmescitteki «Hizb ut-tahrir işi» figurantlarınıñ apayları, oturışuvnı qapalı ilân etken akem hanımğa qarşı şikâyet yazalar.

Dekabr 8 cuma künü Rusiye kontroli altında bulunğan Qırım Yuqarı mahkemesi, tahqiqatnıñ Aqmescitteki «Hizb ut-Tahrir işi»niñ figurantları Ayder Saledinov, Rustem İsmailov, Emil Cemadenov, Uzair ve Teymur Abdullayevlerge muvaqqat izolâtorda (SİZO) apis müddetleriniñ uzatılmasına dair ricasını baqa.

Dekabrniñ 7-nde Rusiye kontroli altında bulunğan Aqmescitteki Kyiv rayonı mahkemesi oktâbrniñ 12-sinde Bağçasarayda tevqif etilgen üç «Hizb ut-Tahrir işi»niñ figurantı – Seyran Saliyev, Memet Belâlov ve Timur İbragimovğa tevqif müddetlerini üç ayğa uzattı. Dekabrniñ 6-sında mahkeme «Hizb ut-Tahrir işi»niñ üç figurantı – Ernes Ametov, Marlen Asanov ve Server Zekiryayevge apis müddetlerini martnıñ 9-na qadar uzattı.

Qırım Rusiye tarafından ilhaq etilgen soñ yarımadada mustaqil jurnalistler, tsivil faaliyetçiler, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette kütleviy tintüvler yapıla.

Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarnıñ qullanıluvını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni, «terroristik» tanılğan 15 birleşmeniñ cedveline kirsetip, yasaq etti.

XS
SM
MD
LG