Ukrainanıñ Yuqarı Radası dekabr 7 kününiñ aqşamki oturışuvında evelden Qırım territoriyasında çalışqan ve şimdi Ukrainanıñ qıtadaki qısmında çalışıp, yarımadadaki kösterüvler ve eşittirüvlerine devam etken devletke ait olmağan teleradioşirketler içün paranıñ ayırılmasını tasdiq etti.
Maliy yardım «Ukraina toprağından sürgün etilgen qırımtatarlarnı ve diger milletlerniñ vekillerini yerleştirüv ve yaşayışları içün şaraitler yaratuv» büdjet porgramınıñ esabından berilecektir.
Qırımtatar Milliy Meclisiniñ reisi ve Ukraina halq deputatı Refat Çubarovnıñ bildirgenine köre, bu para, ilhaq etilgen Qırımğa sputnik vastasınen televideniye ve radio yayınlarını translâtsiya etmek, Kyivde bulunğan studiyalarnıñ kirasını tölemek, kerekli donatmalar almaq ve yarımada içün ukrain ve qırımtatar tilinde kontent azırlamaq içün yapılğan masraflarğa ayırılacaqtır.
Qırımdan köçkenlerge yardım berüv programı devam etkence kanallarğa paranıñ ayırılması da devam etecek.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
