Link açıqlığı

Saatnıñ esas haberi

Umerov ve Çiygoz fin jurnalistlerine Qırımdaki repressiyalar aqqında ikâye ettiler


İlhaq etilgen Qırımdaki apisten azat etilgen Qırımtatar Milliy Meclisi muavinleri İlmi Umerov ve Ahetm Çiygoz fin jurnalistlerine yarımadadaki repressiyalar aqqında ikâye ettiler. Bunı dekabrniñ 2-sinde Facebookta İlmi Umerov bildirdi.

«Bugün Kyivdeki Qırımtatar Milliy Meclisiniñ ofisi ile Finlândiyadaki Ukraina elçiligi arasında teleköpür teşkil etildi. Yigirmi qadar fin jurnalisti Ahtem Çiygoz ve İlmi Umerovnen körüştiler. Sualler esasen işğal etilgen Qırımdaki vaziyet, bizim cinaiy işlerimiz ve planlarımız aqqında edi. Ahtem, Rusiye akimiyeti tarafından Qırımda qırımtatar ve ukrain halqlarına qarşı teşkil etilgen repressiyalarğa terror dedi», – yazdı o.

Ukrainanıñ Finlândiyadaki elçisi Andriy Oliferov teleköpürniñ teşkil eticisi, moderatorı ve tercimanı edi.

Noyabrniñ 8-nde Parijde «Kommunizmniñ 100 yılı. Tarih ve hatıra» pratformasınıñ konferentsiyası esnasında Qırımtatar Milliy Meclisi reisiniñ muavini İlmi Umerovğa «Avropa hatırası ve insafı platforması»nıñ mukâfatı taqdim etildi.

Qırımtatar Milliy Meclisi reisiniñ muavini İlmi Umerov ilhaq etilgen Qırımda eki yıl koloniya-qasabada apis etilüv cezasına mahküm etildi. Ondan ğayrı oña eki yıl cemiyet faaliyetinen oğraşmaq ve kütleviy haber vastalarında çıqışlar yapmaq yasaq etildi. Umerovnı açıq menbalarda yapılğan separatizmge çağıruvda qabaatladılar. O, özüne qarşı açılğan cinaiy işke, siyasiy maqsatlı iş dey.

Rusiye akimiyeti, İlmi Umerov ve Qırımda mahküm etilgen qırımtatar halqınıñ liderlerinden biri Ahtem Çiygoznı azat etip, oktâbrniñ 25-nde Türkiyege teslim etti. Daa soñra Umerovnen Çiygoz Kyivge keldiler.

Umerov, sağlığınıñ teşkerilüvi ve tedaviylenüv içün Almaniyağa barıp kelgen soñ Qırımğa qaytmaq niyetinde olğanını bildirdi.

XS
SM
MD
LG