Link açıqlığı

Meclis reisi Birinci Qurultaynıñ 100 yıllığına bağışlanğan ilmiy işler yarışını ilân etti


Noyabrniñ 30-nda Qırımtatar Milliy Meclisi reisi Refat Çubarov Birinci qırımtatar halqı qurultaynıñ 100 yıllığına bağışlanğan universitet talebeleriniñ ilmiy işleri yarışını ilân etti.

«Yarışta em Ukrainanıñ qıtadaki qısmında, em de vaqtınca işğal etilgen Qırımda bulunğan aliy oquv yurtlarınıñ talebeleri iştrak ete bileler. Yarışta iştirak etilmesiniñ şartı, qırımtatar halqınıñ temsiliy organı olğan qurultaynıñ meydanğa ketirilmesi, işi ve rolü ile alâqalı çeşitli mevzular açıqlanğan müellifniñ qalemine ait unikal ilmiy maqaleniñ yazılmasıdır.

Bildirüvde yarışnıñ bu sene dekabr 1 künü başlaycağı bildirile. İlmiy maqaleler 2018 senesi martnıñ 25-ne qadar qabul etilecekler. Yarışta ğalebe içün 5 biñ hrivna miqdarında mukâfatnıñ berilmesi közde tutula.

«Neticeler 2018 senesi aprelniñ 10-nda Qırımtatar Milliy Meclisniñ resmiy saytında ilân etilecekler», – denile bildirüvde.

Ukraina informatsion siyaset nazirligi, ealige Qurultaynıñ ne olğanını ve qırımtatar milliy areketi içün tarihiy emiyetini bildirmek içün mediakampaniyanı başladı.

Nazirlik, Qırım tarihçısı, Ukraina PEN-klubu azası Gülnara Bekirovanen birlikte Qurultaynıñ meydanğa ketirilmesiniñ maqsadı ve baş vazifelerini añlatqan bir risale azırladı.

Qırımtatar Milliy Qurultayı – milliy toplaşuv, qırımtatar halqınıñ yuqarı temsiliy vekâletli organıdır.

1917 senesi dekabr ayında Qırımtatar halqınıñ qurultayı mavı tüslü milliy bayraq, Qırım hanlarınıñ altın tamğası şeklinde milliy gerb ve milliy gimnni qabul etti.

Dekabrniñ 6-sında Yuqarı Rada Birinci qırımtatar qurultayı münasebetinen tantanalı oturuşuv keçirecek.

XS
SM
MD
LG