Noyabrniñ 23-nde yaqalanğan qırımtatar faalyetçileri Bekir Degermenci ve Asan Çapuhnı Aqmescitten Saqtaki muvaqqat izolâtorğa keçirdiler. Bunı noyabrniñ 28-nde «Krımskaya solidarnost’» cemiyet birleşmesi bildirmekte.
«Bekir Degermenci ve Asan Çapuh Saq şeeriniñ muvaqqat izolâtorında bulunalar. İzolâtor Lenina, 27 soqağında buluna», – denile bildirüvde.
«Krımskaya solidarnost’»te, Aqmescit izolâtorında boş yer tapılmağan içün faaliyetçilerni Saqqa keçirdiler, dep qayd ettiler.
Diger eki faaliyetçi, Kâzim Ametov ve Ruslan Trubaç, Bağçasaray muvaqqat izolâtorında bulunalar.
Rusiye kontroli altında bulunğan Aqmescitteki Kyiv rayonı mahkemesi noyabrniñ 24-nde nevbetteki tintüvler dalğası esnasında yaqalanğan qırımtatar faaliyetçileri Kâzim Ametov, Asan Çapuh, Ruslan Trubaç ve Bekir Degermencini 2018 senesi yanvarniñ 15-ne qadar apiste qaldırdı.
Noyabrniñ 23-nde kündüz ilhaq etilgen Aqmescitte telükesizlik hadimleri bir grup qırımtatarlarnı yaqaladı. Rusiye FSBniñ Qırım boyunca idaresi yaqalanğan faaliyetçilerni Türkiye vatandaşından «aqsız yerde hususan büyük miqdarda talap etüv»de qabaatlay.
Qırımda Rusiyeniñ ilhaqından soñ mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde ketken sayın daa sıq surette tintüvler yapıla.
