«Fevral 26 işi»niñ eki figurantı Mustafa Degermenci ile Ali Asanovğa ev apisi müddeti 2018 senesi fevralniñ 7-sine qadar uzatıldı. Bunı noyabrniñ 28-nde Azatlıq Radiosınıñ muhbiri bildire.
Mahkeme oturışı vaqtında Degermenci, Bekir Degermenciniñ işi boyunca yapılğan tahqiqat areketlerine kelmek ve oña kerekli şeyler ketirmek içün anasını maşinanen evden çıqarmağa ruhset soradı, lâkin mahkeme buña razılıq bermedi.
Ondan ğayrı advokat Taras Omelçenko azatlıq sıñırlama tedbiriniñ yerinden ayırılmaycağı aqqında ahtqa deñiştirmege rica etti, lâkin mahkeme bunı da red etti.
Mahkemeniñ nevbetteki oturışı dekabrniñ 12-sinde saat 14:00-de ötkerilecek.
2015 senesinde bir grup qırımtatar faaliyetçilerge qarşı 2014 senesi fevralniñ 26-nda Qırım Yuqarı Radası binasınıñ divarları yanında Ukrainanıñ topraq bütünligine qoltutmaq maqsadınen ötkerilgen mitingde iştirak etkenler içün mahkeme başlandı. Olarnı kütleviy qarışıqlıqlarda iştirak etkenlerinde qabaatlaylar.
Daa soñra mahkeme «Fevral 26 işi»ni ekige ayırdı: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nabiyevniñ işinden ayırıldı.
Rusiye akimiyeti oktâbrniñ 25-nde Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umeriv ve Çiygoz Kyivge keldiler.
