İlhaq etilgen Qırımda sekiz qırımtatar faaliyetçisine qarşı oktâbrniñ 14-nde bir kişilik piketlerde iştirak etkenleri içün idari davalar açıldı.
Bunı oktâbrniñ 27-nde Facebooktaki videomuracaatta advokat Emil Kurbedinov söyledi.
«Biz şimdi Qurmanda (Krasnogvardeyskoye) bulunamız. Bugün 8 kişini polis şubesine çağırdılar. Bu, oktâbrniñ 14-nde bir kişilik piketlerge çıqqan vatandaşlardır. Polis olarnı qanun bozğanlar saya. Olarğa qarşı idariy dava açıldı. Olar Rusiyeniñ İdariy uquq bozuvları boyunca kodeksiniñ 20.2 maddesi 5-nci qısmı boyunca davağa celp etildi», – dep ikâye etti o.
Advokatıñ aytqanına köre, piketler bir kişilik olğanına baqmadan, qanun bozmayıp çıqqan ve öz fikirni ifade etken adamlarğa qarşı dava açmaq isteyler.
Kurbedinovnıñ fikrine köre, bu, kelecekte bir kişilik piketlerge çıqmaq ve öz fikirni ifade etmek istegenlerni qorquzmaq teşebbüsidir.
Advokat mahkeme oturışı yapılacaq kününi ayrıca bildirecegini ilâve etti.
Rusiye uquqqoruyıcı organları tarafından açıq menbalarda bu hususta izaat berilmedi.
Oktâbrniñ 14-nde Qırımda, Rusiye tarafından ilhaq etilgen yarımadada telükesizlik organları tarafından qırımtatarlarğa, musulmanlarğa qarşı yapılğan tazyıqlarğa narazılıq köstermek maqsadınen bir sıra bir kişilik piketler ötkerildi.
Qırımda Rusiyeniñ ilhaqından soñ mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde ketken sayın daa sıq surette tintüvler yapıla.
