Link açıqlığı

Kyivde Rusiye elçiligi yanında faaliyetçiler Qırımda habersiz ğayıp etkenlerni tapmaqnı talap ettiler


Kyivde noyabrniñ 27-nde faaliyetçiler ayda bir kere yapqan tedbirlerini ötkerip, ilhaq etilgen Qırımda habersiz ğayıp olğanlarnı tapmaqnı talap ettiler. Bunı, tedbirniñ teşkilâtçısı olğan «QırımSOS» cemiyet teşebbüsiniñ vekilleri Facebookta bildireler.

«Rusiye akimiyetine tesir etmek qıyın olğanını yahşı añlaymız. Lâkin bunı yapmaq kerekmiz. Bir afta evel sabıq Yugoslaviyanıñ toprağında cinayetler işlegen sırp liderlerinden biri tribunalda muhakeme etile edi. Qırımda cinayet işlegen Vladimir Putin ve onıñ yardımcıları da muhakeme etilecekler», – dedi «QırımSOS» koordinatorı Tamila Taşeva.

Tedbir vaqtında toplanğanlar bir perfomans ötkerdiler. Olar nevbet ile elçilikniñ qapısına kelip, habersiz ğayıp etkenlerniñ adını ayta ve olar ne yerde olğanlarını soray ediler.

Rusiye elçiliginiñ diplomatları ve vekilleri faaliyetçilerge çıqmadılar.

Qırım aq-uquq qoruyıcı grubu, Rusiye akimiyeti ya da olarqa boysunğan paramilitar küçleriniñ alıp qaçuvlarğa alâqası olğanını saya.

Kremlniñ kontroli altında bulunğan Qırım akimiyeti de facto ğayıp oluv vaqialarını tanıy, lâkin olarğa öz alâqasını red ete.

Faaliyetçilerniñ malümatına köre, Qırım Rusiye tarafından ilhaq etilgen soñ 44 Qırım sakini ğayıp oldı, olarnıñ 17-si tapıldı, 16-sı ale daa habersiz ğayıp oldı dep sayıla, 6-sı ölü tapıldı, daa ekisi azatlıqtan marum etüv yerlerinde bulunalar.

Dünya qırımtatar kongresi icra komitetiniñ azası Ervin İbraimov 2016 senesi mayısnıñ 26-sında Bağçasarayda belli olmağan şahıslar tarafından alıp qaçılğan edi. Videoközetüv kamerası, Rusiye yol polisi formasında eki şahısnıñ İbraimovnıñ maşinasını toqtatqanını ve öz mikroavtobusına süyreklep kirsetkenini qayd etti.

Qırım aq-uquq qoruyıcı grubu, alıp qaçuvlarnıñ Rusiye akimiyeti ya da onıñ kontroli altında bulunğan paramilitar grupları tarafından yapılğanını tahmin ete.

XS
SM
MD
LG