Link açıqlığı

Qırımtatar Milliy Meclisiniñ reisi Refat Çubarov, qırımtatar milliy areketiniñ veteranı Veciye Kaşkanıñ cenaze künü olğan noyabrniñ 24-ü, Matem künü olaraq ilân etilgenini bildirdi.

Onıñ aytqanına köre, bu künde bütün Qırımda ve qırımtatarlarnıñ yarımadanıñ tışında yaşağan yerlerinde qırımtatar milliy bayraqları biraz endirildi.

Çubarovnıñ qayd etkenine köre, Qırımtatar Milliy Meclisi Veciye Kaşkanıñ soy-aqrabalarına samimiy taziye bildire.

Facebooktaki saifesinde o: «Qırımtatar Milliy Meclisi Rusiye işğalci akimiyetinden yarımadada insan aqlarınıñ bütün sıñırlanmalarını toqtatmaq ve em de qanunsız ilhaq etilgen Qırımnı deral tamamile azat etmekni talap ete», – dep yazdı.

Noyabrniñ 24-nde Qırımnıñ Qarasuvbazar rayonındaki Üçköz (Novoklönovo) köyünde qırımtatar milliy areketiniñ veteranı Veciye Kaşkanıñ cenazesi yapılmaqta.

«Krımskaya solidarnost’» birleşmeniñ malümatına köre, onıñnen sağlıqlaşmaq içün bütün yarımadadan qırımtatarlar keldi. Köydeşleri, Veciye Kaşkanıñ qorantasına taziye bildirmek ve olarnen beraber olğanlarını köstermek içün qırımtatar halqınıñ bayrağını köterip astılar.

Bir grup qırımtatar faaliyetçileri yaqalanğanda qırımtatar milliy areketiniñ veteranı Veciye Kaşka yaramay oldı. Adiseniñ yüz köstergen yerinden onı «acele yardım» alıp ketti. Daa soñra qadınnıñ vefat etkeni belli oldı.

Ukrainanıñ qıtadaki qısmında bulunğan QMC Prokuraturası noyabrniñ 23-nde qanunsız tintüvler, yaqalavlar ve qırımtatar milliy areketiniñ veteranı Veciye Kaşkanıñ ölümi vaqiaları boyunca cinaiy işler açtı.

XS
SM
MD
LG