Link açıqlığı

Saatnıñ esas haberi

Avropa Birligi prezidenti Donald Tusk, Avropa Birliginiñ iç bir vaqıt Qırımnıñ Rusiye tarafından ilhaqını tanımaycağını bildirdi. Bunı o, noyabrniñ 23-nde Brüsseldeki körüşüvleri esnasında Ukraina prezidenti Petro Poroşenkoğa söyledi.

«Şarqiy ortaqlıq sammitine azırlıq çerçivesinde Petro Poroşenko ile körüştim. Keder ile efsaneviy faaliyetçi Veciye Kaşkanıñ ölümini hatırlap, qırımtatar cemaatçılığı ve bütün Ukrainanen beraber olğanımıznı ifade ettik. AB iç bir vaqıt Qırımnıñ Rusiye tarafından qanunsız ilhaqını tanımaz», – dep qayd etti Tusk.

Noyabrniñ 23-nde kündüz ilhaq etilgen Aqmescitte telükesizlik hadimleri bir grup qırımtatar faaliyetçilerini yaqaladılar. FSB yaqalanğanlarnı, Qırımtatar Milliy Meclisiniñ azaları olaraq kösterdi. Qırımtatar halqınıñ temsiliy organında bu malümat red etildi.

Bir grup qırımtatar faaliyetçileriniñ işbu yaqalanuvı esnasında qırımtatar milliy areketiniñ veteranı Veciye Kaşka yaramay oldı. Adiseniñ yüz köstergen yerinden onı «acele yardım» alıp ketti. Daa soñra qadınnıñ vefat etkeni belli oldı.

Qırımtatar milliy areketiniñ faaliyetçisi Nariman Celâl, bir grup qırımtatar faaliyetçileriniñ yaqalanmasına sebepçi olğan Türkiye vatandaşı, qırımtatar milliy areketiniñ veteranı Veciye Kaşkanıñ qorantasından para hırsızladı, dey.

İşğal etilgen Qırımdaki Rusiye FSBsi, yaqalanğan faaliyetçilerni, Türkiye vatandaşından «hususan büyük miqdarda mal-mülk veya para talap etüv»de qabaatlay.

Al-azırda yaqalanğanlar muvaqqat izolâtorda bulunalar.

Rusiye tarafından yapılğan ilhaqından soñ Qırımda mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde sıq-sıq tintüvler yapıla.

XS
SM
MD
LG