Link açıqlığı

Qırımda yaqalanğan faaliyetçilerni muvaqqat izolâtorğa alıp kettiler (+ video)


Aqmescitte Asan Çapuhnıñ yaqalanuvı, 2017 senesi noyabr 23 künü

İlhaq etilgen Aqmescitte Rusiye telükesizlik hadimleri bir grup qırımtatar faaliyetçilerini muvaqqat izolâtorğa alıp kettiler.

Azatlıq Radiosı bilgirgeni kibi, bu, ilk tahqiqat işleri bitirilip, maşinaları közden keçirilgen soñ yapıldı.

«Tahqiqat işleri esnasında Bekir Degermenciniñ maşinası közden keçirilip, mühürlendi. Asan Çapuhnıñ maşinası teşkerildi. Degermenciden kompyuter, pasport ve Kyivde neşir etilgen fevral 26-sı aqqında kitapnı tutup aldılar», – dep bildire muhbir.

Teşkerüv bitken soñ bütün faaliyetçilerni izolâtorğa alıp kettler. Tahqiqatçılar, faaliyetçiler içün sıñırlav tedbirleriniñ şekli nevbetteki eki kün içünde tayin etilecek, dep bildireler.

Muhbirniñ bildirgenine köre, içinde qırımtatar milliy areketiniñ veteranı Veciye Kaşkanıñ cesedi bulunğan acele yardım maşinası qomşu soqaqta tura edi. Tibbiyet hadimleri, ölüm vaqiasını qayd etmek ve cesetni mahkeme-tibbiyet ekspertizasına yollamaq içün tahqiqatçılarnı bekley ediler.

Noyabrniñ 23-nde kündüz ilhaq etilgen Aqmescitte telükesizlik hadimleri bir grup qırımtatar faaliyetçilerini yaqaladılar. FSB yaqalanğanlarnı, Qırımtatar Milliy Meclisiniñ azaları olaraq kösterdi. Qırımtatar halqınıñ temsiliy organında bu malümat red etildi.

Bir grup qırımtatar faaliyetçileriniñ işbu yaqalanuvı esnasında qırımtatar milliy areketiniñ veteranı Veciye Kaşka yaramay oldı. Adiseniñ yüz köstergen yerinden onı «acele yardım» alıp ketti. Daa soñra qadınnıñ vefatı aqqında haberler keldi.

Qırımtatar milliy areketiniñ faaliyetçisi Nariman Celâl, bir grup qırımtatar faaliyetçileriniñ yaqalanmasına sebepçi olğan Türkiye vatandaşı, qırımtatar milliy areketiniñ veteranı Veciye Kaşkanıñ qorantasından para hırsızladı, dey.

İşğal etilgen Qırımdaki FSB idaresi, yaqalanğan faaliyetçilerni, Türkiye vatandaşından «hususan büyük miqdarda mal-mülk veya para talap etüv»de qabaatlay.

Rusiye tarafından yapılğan ilhaqından soñ Qırımda mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde sıq-sıq tintüvler yapıla.

XS
SM
MD
LG