Ukraina Tış işleri nazirligi, Qırım tamır halqını yoq etüv areketleriniñ toqtatılmasını talap ete.
Bunı noyabrniñ 23-nde Twitterde, ilhaq etilgen yarımadadaki yañı tintüvler ve tevqiflerni iza etip, Tış işleri nazirliginiñ sözcüsi Maryana Betsa yazdı.
«İşğal etilgen Qırımda kene tintüvler, tevqifler. Yoqsa bu, Rusiyeniñ BMT Baş assambleyası yanındaki 3-nci komitetniñ qararı içün öçümi? Qırım tamır halqını yoq etüv areketleriniñ toqtatılmasını talap etemiz», – dep bildirdi Betsa.
Noyabrniñ 23-nde kündüz ilhaq etilgen Aqmescitte telükesizlik hadimleri bir grup qırımtatar faaliyetçilerini yaqaladılar. FSB yaqalanğanlarnı, Qırımtatar Milliy Meclisiniñ azaları olaraq tanıttı. Qırımtatar halqınıñ temsiliy organında bu malümat red etildi.
Bir grup qırımtatar faaliyetçileriniñ işbu yaqalanuvı esnasında qırımtatar milliy areketiniñ veteranı Veciye Kaşka yaramay oldı. Adise yüz köstergen yerinden onı «acele yardım» alıp ketti. Daa soñra qadınnıñ vefatı aqqında haberler keldi.
Qırımtatar milliy areketiniñ faaliyetçisi Nariman Celâl, bir grup qırımtatar faaliyetçileriniñ yaqalanmasına sebepçi olğan Türkiye vatandaşı, qırımtatar milliy areketiniñ veteranı Veciye Kaşkanıñ qorantasından para hırsızladı, dep iddia ete.
İşğal etilgen Qırımdaki FSB idaresi, yaqalanğan faaliyetçilerni, Türkiye vatandaşından «hususan büyük miqdarda mal-mülk veya para talap etüv»de qabaatlay.
Rusiye tarafından yapılğan ilhaqından soñ Qırımda mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde sıq-sıq tintüvler yapıla.
