Noyabrniñ 23-nde ilhaq etilgen Qırımda qırımtatar milliy areketi faaliyetçileriniñ evlerinde tintüvler yapıldı. Bunı Azatlıq Radiosı muhbiri bildire.
Bu cümleden, telükesizlik küçleriniñ hadimleri «Fevral 26 işi»niñ figurantı Mustafa Degermenciniñ babası Bekir Degermenciniñ Suvdağ civarında bulunğan Suvuq Sala (Gruşevka) köyündeki evinde tintüv yaptılar. Daa soñra telükesizlik küçleriniñ hadimleri Aqmescitte Kyiv rayonı mahkemesi yanında, Vorovskogo soqaqındaki «Medoborı» kafesinde Bekir Degermencini tevqif ettiler.
Daa bir tintüv qırımtatar milliy areketiniñ faaliyetçisi Kâzim Ametovnıñ Suvuq Sala köyündeki evinde yapıldı. Onıñ evi yanına dört maşina olıp telükesizlik küçleriniñ hadimleri keldi.
«Telükesizlik küçleriniñ hadimleri boş evge sürip kirdi. Tintüv vaqtında Elmiranen aqayı evde yoq ediler. Aynı evde yaşağan babası keldi, amma hadimler onı evge yibermediler», – dedi muhbir.
Tintüv aqqında haber Aqmescitten de keldi (Krımskaya soqağında), faqat anda tintüv kimniñ evinde yapıldı, şimdilik belli degil.
Azatlıq Radiosınıñ muhbiri, tintüvler neticesinde Bekir Degermenci, Asan Çapuh ve Kâzim Ametovnıñ tevqif etilgenlerini bildire.
Rusiye telükesizlik küçleriniñ memurları işbu haberniñ yayınlanuv vaqtına qadar açıq menbalarda tintüvler aqqında iç bir izaat bermediler.
İlhaq etilgen Qırımdaki Rusiye FSBniñ idaresi, faaliyetçiler «Türkiye vatandaşından hususan büyük miqdarda mal-mülk veya para talap etti» deye zan ete.
Rusiye tarafından yapılğan ilhaqından soñ Qırımda mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar deye zan etilgen Qırım musulmanlarınıñ evlerinde sıq-sıq tintüvler yapıla.
