Ukrainanıñ Kino meseleleri boyunca Devlet agentliginiñ yolbaşçısı Filipp İlyenko, Ukrainanıñ qırımtatar asıllı rejissöri Ahtem Seytablayevniñ «Kiborglar» adlı yañı filmi bütün beklegenlerinden üstün olıp çıqqanını bildirdi.
İlyenko bunı noyabrniñ 21-sinde Facebooktaki saifesinde bildirdi.
«Bugün rejissör Ahtem Seytablayevniñ «Kiborglar» filmini baqtım. Lenta bütün beklegenlerimden üstün olıp çıqtı. Onıñ Devletkino yardımınen meydanğa ketirilgeninden ğurur duyam! Dekabrniñ 7-sinden başlap o, kinoteatrlardadır», – dep yazdı Ukraina memurı
Açıq menbalardan alınğan malümatqa köre, «Kiborglar» filmi, Ukraina tarafından devletniñ Şarqında ötkerilmekte olğan terrorizmge qarşı operatsiya esnasında Donetsk ava limanı içün yapılğan uruşlar aqqında ikâye ete.
Film Ukrainanıñ Devletkinosından 24 million hrivnağa yaqın miqdarda maliy yardım aldı. Bu raqam, onıñ umumiy fiyatınıñ yarısıdır.
Rejissör Seytablayevniñ fikrine köre, çekken filminiñ janrı arbiy drama.
