Ukraina Telükesizlik Hizmetiniñ (SBU) bildirgenine köre, 2015 senesi Donetsk vilâyetinde arbiy qısımdan ruhsetsiz qaçıp, ilhaq etilgen Qırımğa barğan qaçaq Kyivde yaqalandı.
SBU matbuat hizmeti noyabrniñ 20-sinde bildirgeni kibi, Ukraina Cinaiy kodeksi 407-nci maddesiniñ 4-nci qısmı mucibi açılğan cinaiy iş çerçivesinde mahsus hizmetniñ operativ hadimleri leytenantnıñ Qırımda muvaqqat sığınaq tapmağa tırışqanını protokolğa yazdılar. Ondan ğayrı o, FSB hadimlerinen bağ tutıp, olarğa terrorğa qarşı operatsiyanıñ küçleri aqqında bilgen malümatnı yollay edi.
«Ukraina Telükesizlik Hizmetiniñ hadimleri, qaçaqnıñ noyabr ayında şahsiy meselelerni al etmek içün gizliden Kyivge kelgenini tayin etip, vaqtınca işğal etilgen yarımadağa qaytmağa tedarik etkende onı yaqaladılar. Şimdi leytenant, Donetsk garnizonınıñ Arbiy prokuraturasına yollanmaq ve nezaret altında bulunuv şeklinde sıñırlav tedbiri tayin etilmek içün konvoy ile arbiy uquq ve nizam hizmetine teslim etildi», – denile bildirüvde.
Muessiseniñ matbuat hizmetinde yaqalanğannıñ ilhaq etilgen Qırım ile memuriy sıñırnı nasıl keçip, ülkeniñ qıtadaki qısmına nasıl kirgenine dair tafsilâtlarnı bildirmeyler.
Ukrainanıñ Yuqarı Radası 2014 senesi fevral 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko münasip qanunnı imzaladı. Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.
