Link açıqlığı

«Fevral 26 işi»niñ qorçalayıcıları Çubarov ve Ciygoznıñ soraştırılmasını istedi


İlhaq etilgen Qırımda «Fevral 26 işi» boyunca mahkemeniñ meclisinde advokatlar Qırımtatar Milliy Meclisi reisi Refat Çubarov ve onıñ muavini Ahtem Çiygoznıñ soraştırılmasını istep ariza berdiler. Bunı noyabrniñ 17-sinde Azatlıq Radiosı rus hizmetiniñ muhabiri bildirdi.

Ondan ğayrı olar, Qırımnıñ Yuqarı mahkemesinden Ahtem Çiygoznıñ mahkeme işi boyunca oturış protokolları ile mahkeme ükmü kopiyalarınıñ alınmasına dair istek bildirdiler.

Advokat Edem Semedlâyev bergen tafsilâtqa köre, akem, zarar körgen İvkin soyadlı şahısnı teşkermek içün Çiygonıñ protokolı ve ükmüni istedi.

«Merkeziy bölge mahkemesi bu zarar körhenni tapalmadı. Ali Asanovnı tamam oña zarar ketirgeninde qabaatlaylar. Mahkeme bu maalgece iç bir cevap bermedi», – dedi Semedlâyev.

Mahkeme, arizalar boyunca qarar almaq içün noyabr 20 künü saat 11:00-gece mahkeme oturışını toqtattı.

«Fevral 26 işi»niñ figurantları Mustafa Degermenci ve Ali Asanov 2017 senesi aprelniñ 6-sından başlap ev apisi altında bulunalar. Ondan evel qabaatlanğanlar Aqmescit tahqiqat izolâtorında (SİZO) buluna ediler.

2015 senesinde yarımadada bir grup qırımtatar faaliyetçilerni, 2014 senesi fevral 26 künü Qırım Yuqarı Radasınıñ binası yanında Ukrainanıñ bütünligine qoltutuv mitinginde iştirak etkenleri içün üküm etmege başladılar. Olarnı kütleviy qarışıqlıqlarda iştirak etkenlerinde qabaatlaylar.

Daa soñra mahkeme «Fevral 26 işi»ni ekige ayırdı: qırımtatar milliy areketiniñ liderlerinden biri Ahtem Çiygoznıñ işi, davanıñ figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nabiyevniñ işinden ayırıldı.

Rusiye oktâbrniñ 26-nda Ahtem Çiygoz ve İlmi Umerovnı Türkiyege teslim etti.

XS
SM
MD
LG