Ukrayina prezidenti Volodimir Zelenskıy AB liderlerine Ukrayinağa qarşı Cenkins bitirüv muzakereleri Rusiye ile yañıdan başlana bile, dep ayttı. Bu aqta onıñ Avropa şurası toplaşuvında martnıñ 19-nda önline çıqışında aytıldı, dep haber ete Azatlıq Radiosınıñ Brüssel mühbiri.
"Diplomatiyanı semereli yapmaq ve cenkni bitirmek içün elimizden kelgenini yapamız. Ve epiñiz bunı köresiñiz. ABD prezidentiniñ taqımınen çalışıp, men Avropanı celp etem ve sizni haberdar turam… Ve soñki künleri Amerika tarafınıñ muzakereler tezden yañıdan başlaycağına dair işaretlerini aldıq. Amma bu sefer Rusiye buña nasıl kelecek?", – dep diqqat etti Ukrayina prezidenti.
Zelenskıy Yaqın Şarqtaki zıddiyetni aytıp, Ukrayinağa kerek olğan ava mudafaası sarf etile ve dünyanıñ cermay fiyatları artqanına sebep ola, dep hatırlattı. O, ABniñ blok etilgen 20-nci sanktsiyalar paketi ve ABDniñ endi deñizde tankerlerde bulunğan Rusiye cermayına qarşı sıñırlavlarınıñ yımşamasını qayd etti.
Muzakere masasında Ukrayinağa ABniñ 90 milliard evrolıq blok etilgen krediti Rusiyege özüni daa küçlü is etmege imkân bere bile, dep tüşüne Zelenskıy.
"Üç aydan berli Ukrayina içün Avropa tarafından eñ küçlü telükesizlik kefaleti çalışmay – bu ve kelecek yılnıñ 90 milliard evrolıq yardım paketi. Bu bizim içün kritik. Bu ayat qorunması içün bir resurs… Bugün bile biz bu yardım bloktan çıqarılacaqmı bilmeymiz", – dep qayd etti Ukrayina prezidenti.
Zelenskıy Avropa Birligini Ukrayinağa pek kerek olğan paranı bermege çağırdı. Prezident öz tarafından "("Dostluq") cerma borusınen bağlı elinden kelgen er şey yapa", dep işandırdı.
"Energetik şirketlerimiz – "Naftoğaz" ve "Ukrtransnafta" – taqımımız añlaşmağa riayet etmek içün semereli çalışa. Amma qarar siziñ: bunıñ istilâcığa yardım etkenini bilip, Rusiye cermayınıñ Avropağa ketmesini isteysiñizmi", – dep qayd etti Zelenskıy.
Ukrayina lideriniñ aytqanına köre, 90 milliarddan eñ az beş milliard evrolıq kelecek qışqa Ukrayinanı azırlamaq içün ketecek. Para silâ içün de kerek, dep qayd etti Zelenskıy.
"Avropalı silâ istisalcıları bekley – añlaşmalarnı töleycegimizni bekleyler: Ukrayina içün Avropa uçaqları, Avropa ava mudafaası, Avropa donatuvı. İş yerleriñiz ve tehnologik inkişafıñız aqqında laf kete. 90 milliardlıq paket Avropa içün de çalışacaq", – dep qayd etti Zelenskıy.
AB liderleri martnıñ 19-nda olğan sammitte Macaristan baş naziri Viktor Orban blok etken Ukrayina içün çoq milliardlı kreditni tasdıqlamadı. Macaristan naziri tenqitke baqmadan fikrini deñiştirmedi.
Sammitte Ukrayinanıñ muzakere etilüvi yekünlendi, hulâsalar 25 aza devleti tarafından qanaatlendirildi. Olar Avropa şurası saytında derc etildi. Ukrayina beyannamesine qoşulmağan devletler arasında Macaristandan ğayrı bıltır dekabr ayından soñ Slovakiya peyda oldı.