"Qırım birdemligi"niñ bildirgenine köre, uquq qoruyıcınıñ evine nomeraları olmağan maşnalar kelgen. Olardan maska kiygen hadimler çıqqan ve evge kirgen.
Tintüvden soñ Zudiyevanı Aqmescitteki "Ekstremizmge qarşılıq kösterüv merkezi"ne alıp ketkenker. Tintüv vaqtında evde 12 ve 9 yaşında çağına yetmegen balalar bar edi.
''Bugün saba saat altıda men ayaq patırdısı sesinden uyandım. Kamerağa baqıp, olarnıñ qanun qoruyıcı organlarınıñ hadimleri olğanını añladım. Çitni aşıp, qapunı açtılar ve azbarğa kirdiler. Olar qapunı yüksek sesnen qaqtılar. Beklemege rica ettim, çünki biz kiyinmekte edik. Olar Kiyev rayon mahkemesiniñ qararını taqdim ettiler, bizde teşkerüv keçirilecek, dep ayttılar. Amma olar tintüv keçirdiler, er yerni qarıştırdılar, baqmaq içün eşyalarnı çıqarmağa mecbur ettiler", - dep izaatladı faalniñ aqayı Seytasan Çikiyev.
Zudiyevanıñ evinde keçirilgen tintüv devamında telükesizlik hadimleri video nezaret registratorını, bütün telefonlarnı, flash-disklerni ve noutbuknı tutıp alğanlar.
Berilgen malümatqa köre, tintüv yerine advokatlar Emil Kurbedinov ve Edem Semedlâyev kelgen. Evge kirmege tırışqankar, amma olarnı kirsetmegenler.
İyülniñ 27-nde Aqmescitteki Qırım Yuqarı mahkemesiniñ binası yanında Rusiye quvetçileri Nariman Celâl ve Ahtemov qardaşlarına qoltutmağa kelgen insanlarnı tutqan edi. Yaqalanğanlar arasında "Qırım birdemliginiñ" eki jurnalisti ve uquq qoruyıcı Lutfiye Zudiyeva bar. Oña 12 biñ ruble para cezası berilgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
