Ukrayına prezidenti Volodımır Zelenskıy Ukrayına Rusiye ile dialog qurmağa azır, amma Rusiye Federatsiyasınıñ prezidenti deñişmeli, dep ayttı. Bu aqta o, Ukrayına milliy telükesizlik ve mudafaa şurasınıñ toplaşuv neticelerine köre bildirdi.
Onıñ aytqanına köre, Ukrayına muzakere ğayretlerine köre lider edi ve lider olıp qalacaq, çünki rusiyege daima teñ, açıq, lâyıq ve adaletli şartlarda añlaşmağa teklif etken edi.
«Bu Rusiye prezidentinen buña imkân yoq, bes-belli. O, itibar ve aqiqat ne olğanını bilmey. Şunıñ içün Rusiye ile dialog qurmağa azırmız, amma Rusiye prezidenti deñişmeli», – dep ayttı Ukrayına prezidenti.
Zelenskıy Ukrayına «quvetleşüv ve işğalcilerni quvuv yolunı» saylay, dep qayd etti. «Biz bu yoldan keçecekmiz», – dep qayd etti Ukrayına prezidenti.
Sentâbrniñ 30-nda Rusiye prezidenti Vladimir Putin Rusiye ordusı zapt etken Donetsk, Herson, Lugansk ve Zaporijjâ vilâyetleri Rusiyege qoşulacaq, dep ilân etti.
Ukrayına prezidenti Volodımır Zelenskıy tezleştirilgen protsedurağa köre NATOğa kirüv arizasını bere, dep ilân etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
