Ukraina prezidenti Volodımır Zelenskıy, Ukraina ve Rusiyede tutulğan adamlarnıñ "er kesni er keske" şeklinde "büyük" almaşuvını bekley, dep ayttı.
Bunı o, dekabrniñ 4-ünde Kyivde İsveçre baş nazirinen beraberlikte keçirilgen briefingde ayttı.
Zelenskıy qayd etkeni kibi, o, bütün ukrain siyasiy mabüsler "Yañı Yılnı evde qutlağanını" istey.
"Biz, siyasiy mabüslerni qaytardıq. Menim içü almaşuv - bir müim gumanitar sualdir, men, "er kesni er keske" adı olğan büyük almaşuvnı isteyim. Meni bütün bizimkilerniñ taqdiri raatsızlay, men episi evde olğanını isteyim", - dedi Ukraina prezidenti.
Zelenskıy, bu meseleni Parijde olacaq "normand sammiti"nde de muzakere etmege ümütlene.
Daa evel Qırımtatar Milliy Meclisiniñ reisi Refat Çubarov, dekabr 9-ında keçecek "Normand formatında" körüşüvde Qırım mevzusını kötermege çağırttı.
Oktâbrniñ 1-nde olğan brifingde prezident Volodımır Zelenskıy, Minskteki Üç taraflı bağ gruppasınıñ toplaşuvında ukrainalı mabüslerniñ azat etilüviniñ ekinci basamağı muzakere etildi, dep bildirdi.
Ukraina Yuqarı Radasınıñ insan aqları vekâletlisi Lüdmila Denisovanıñ malümatına köre, Rusiyede ve işğal etilgen Qırımda 87 qırımtatar tutula.
