Ukrayına prezidenti Volodımır Zelenskıynıñ bildirgenine köre, Ukrayına Silâlı quvetleri Rusiye işğal etken Qırım ve Aqyarda Rusiyeniñ arbiy anbarlarını ve bazalarını yoq etecek. O, yarımada sakinlerini Rusiye arbiy obyektlerinden uzaq olmağa çağırdı. Bu aqta, avgustnıñ 30-nda yapqan muracaatında ayttı.
Zelenskıy, Rusiye ordusınıñ «telükesiz bazası, tınç bir yeri olmaycaq», dep bildirdi.
«İmayecilerimiz işğalcilerniñ bütün anbar ve ştablarını, tehnikasını yoq etecek. Aqyarda olsa – Aqyarda. Luganskta olsa – Luganskta. Bu Ukrayına toprağı ve işğalcilerniñ tek eki çaresi bar: ya qaçacaqlar, ya esirlikke teslim olacaqlar. Başqa çare qaldırmaymız», – dedi Zelenskıy.
«Bugün Qırımdaki insanlarımıznıñ diqqatını daa bir kere celp etmege isteyim: lütfen, Rusiye arbiy obyektlerinden uzaq oluñız, Rusiye bazaları ve arbiy uçaq alanlarına yaqlaşmañız ve Ukrayına mahsus hızmetlerine işğalciler aqqında malümat beriñiz, Qırım daa tez azat etilsin», – dep qoştı Zelenskıy.
Avgustnıñ 23-nde Ukrayına prezidenti Volodımır Zelenskıy «Qırım platformasınıñ» sammitini açıp, qırımlılarğa Ukrayına akimiyeti Qırımnı «mıtlaqa keri alacaq», dep ayttı.
Avgustnıñ 30-nda Ukrayına Tış işler naziri Dmıtro Kuleba «bu cenkte Ukrayınanıñ ğalebesi – onıñ topraq bütünliginiñ ğayrıdan tiklenmesi, arbiy ve diplomatik yolnen», dep bildirdi.
Soñki aftaları Qırım ve Aqyarda aman-aman er kün patlavlar ola. Rusiye akimiyeti bunı «Ukrayını uçucısızlarınıñ tüşürilüvi» ve «ava mudafaa sistemasınıñ işi» dep añlata.
Avgustnıñ 16-nda saba işğal etilgen Qırımnıñ Canköy rayonında patlavlar oldı. Silâ anbarları, transformator alt stantsiyasında patlavlar ve demir yolnıñ zarar körgeni aqqında haber etildi. Rusiye akimiyeti Canköy rayonınıñ Qalay köyünden 3 biñden çoq sakin tahliye etildi, dep bildirdi.
Rusiye Mudafaa nazirligi Qırımnıñ şimalinde olğanlarnı «diversiya» dep adlandırdı. Qırımda cinaiy iş açıldı. Şübheli ya da tutulğanlar aqqında malümat berilmey.
Qırımnıñ Rusiye yolbaşçısınıñ mesleatçısı Oleg Krüçkov Qırımdaki patlavlarnı «terakt» dep adlandırdı.
The New York Times neşri yüksek rutbeli Ukrayına memurına atfı etip, işğal etilgen Qırımnıñ Canköy civarındaki patlavlarğa «elit ukrayin bölüginiñ» alâqası bar, dep bildirdi. Neşirniñ qayd etkenine köre, memur adı gizli olğanını istegen.
Avgustnıñ 9-nda Saq rayonınıñ Novofedirivka qasabasınıñ arbiy uçaq alanında patlavlar oldı. Rusiye akimiyeti «yaqın evlerden» tahminen 30 kişi tahliye etildi, dep bildirdi. 60-tan çoq mesken ev zarar kördi.
Rusiye Mudafaa nazirligi Novofedirivkada (Saq) arbiy uçaq alanında olğan patlavlarnıñ sebebi «bir qaç aviatsiya silâsınıñ detonatsiyası» oldı, dep bildire. «İnterfaks» Rusiye neşiri Rusiye Federatsiyasınıñ Mudafaa nazirligindeki menbasına esaslanıp haber etkenine köre, müessise patlavlarnıñ esas sebebi olaraq «yanğın telükesizligi qaideleriniñ bozuluvını» saya.
Ukrayına akimiyeti ve arbiyleri Rusiye işğal etken Qırımdaki patlavlardan mesüliyetini tanımadı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
