Ukrayina ve Rusiye arasında muzakereler keçirile bile, amma ğarbiy ortaqlarnıñ havfsızlıq kefaletlerini bermesi müimdir, dep qayd etti prezident Volodımır Zelenskıy ITV News ingliz telekanalına bergen intervyüsında.
Zelenskıy «ABD ve Avropanıñ Ukrayinadan vazgeçmeycegi añlaşılsa, o, Rusiyenen er angi muzakere formatına azır olacağını» ayttı.
«Amerika ve Avropa bizni taşlamaycaqlarını añlasam, bizge qoltutsa ve telükesizlik kefaletlerini berse, men er angi muzakere formatına azır olur edim», – dep qayd etti prezident.
Fevralniñ 4-nde derc etilgen Britaniya jurnalisti Pirs Morganğa bergen intervyüsında Ukrayina prezidenti Volodımır Zelenskıy «Ukrayina vatandaşlarına barışıq ketirecek başqa yol olmasa», Rusiye prezidenti Vladimir Putinnen barışıq muzakereleri içün oturmağa azır olğanını ayttı.
Amerikanıñ Cenkni tedqiq etüv institutınıñ tahminlerine köre, Putin yanvarniñ 20-nde Kreml Rusiyeniñ Ukrayinağa qarşı cenki meselesinde ABDnen muzakere keçirmege azır, amma Ukrayinanıñ teslimi talaplarından vazgeçmeycegini tekrarlap ayttı.
ABD prezidenti Donald Trump Rusiye zenaatdaşı Vladimir Putinnen telefon vastasınen laf etip, Rusiyeniñ Ukrayina cenkini bitirüv meselesini muzakere etti, dep haber etti fevralniñ 8-nde keç vaqıtta New York Post. Bu subet ne vaqıt olğanını aytmadı. Beyaz Saray bunı haber etmedi ve Amerika prezidentiniñ sözlerini aydınlatmadı.
Aynı vaqıtta, Putinniñ spikeri Dmitriy Peskov bu subetni ne red etti, ne de tasdıqladı.
Fevralniñ 7-nde Trump kelecek afta Ukrayina prezidenti Volodımır Zelenskıynen körüşip, cenk bitirilüvini muzakere etecek, dep ayttı.
Trump tekrar prezident olğan soñ Ukrayina ve Rusiye arasında cenkni tez bitirmek kerek, dep çoq aytqan edi. ABD prezidentni cenkni toqtatuv yollarını aydınlatmadı.
Fevralniñ 4-nde Britaniya jurnalisti Pirs Morganğa bergen intervyüsında Ukrayina prezidenti Volodımır Zelenskıy «Ukrayina vatandaşlarına barışıq ketirecek başqa yol olmasa», Rusiye prezidenti Vladimir Putinnen barışıq muzakereleri içün oturmağa azır olğanını ayttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
