Ukrayina prezidenti Volodımır Zelenskıy, ukrayin arbiyleri arasında elâk olğanlarnıñ sayısı er kün deñişe, ve müsbet tarafqa degil, dep bildirdi.
"Ne qadar olğanını bilem. Er kün qaç adamnı coyğanımıznı bilem. Menim içün bu pek acınıqlı ve pek müim bir sual. Yazıq ki, er kün bu deñişmelerni körem, ve olar yahşı tarafqa degil. Azca olmay. Şimdilik bu raqamnı aytıp olamayım", — dep ayttı siyasetçi BBC intervyusında.
Zelenskıy, Rusiye ile farq pek büyük olğanını qayd etip, ğayıplarnı azlaştırmaq kerek olğanını qayd etti.
"Bu, olar öz adamlarınıñ ayatı içün küreşmegenini köstere, olarnı cenk meydanında qaldıralar", - dey lider.
Ukrayinanıñ daa ne qadar cenkleşe bilecegi sualine cevap bergende, Zelenskıy dedi ki, "bu er şeyden evel arbiylerniñ ahlâqiy ruhuna, arbiylerniñ aylıqları olsun dep çalışqan halqnıñ ahlâqiy ruhuna, Ukrayinada arbiyler ve vatandaşlar arasında birlikke, em de Ğarpnıñ birligine bağlı".
2024 senesi fevralniñ 25-nde Ukrayina prezidenti Volodımır Zelenskıy, istilâ başlağanından berli ilk sefer, 31 biñ ukrayin arbiy elâk olğanını bildirdi. Aynı zamanda siyasetçi, ukrayin arbiyleri arasında yaralanğan ve ğayıp olğanlarnıñ sayısını aydınlatıp olamay, dep ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
