Ukrayina prezidenti Volodımır Zelenskıy cenkni bitirüvnen bağlı nevbetteki körüşüvler ABDde olacaqtır, dep ayttı, dep yaza Azatlıq Radiosı.
"Kyivde tolu maruza içün muzakere taqımını bekleyim, bir çoq şeyni telefonda laf etmege imkânsız. Şimdi ayta bileceklerimizden – eñ yaqın vaqıtta nevbetteki körüşüvler planlaştırıla. İhtimal Amerikada", – dedi o, video muracaatında.
Zelenskıy bu körüşüvlerniñ erkânı ve formatını aytmadı, amma Ukrayina "barışıqnı yaqınlaştırğan ve onı telükesiz, uzun ve Rusiyeni cenkleşmek maddesinden marum etken bütün iş formatlarına azır", dep qoştı.
"Bu cenkniñ bitmesi müim, Rusiyeniñ istilâ içün mukâfatı olmamalı. Bu kerçek telükesizligimizni qaytarıp kefil etken esas printsiplerinden biri ola", – dep qayd etti o.
Fevralniñ 4-5-nde Birleşken Arap Emirlikleriniñ paytahtı Abu-Dabide ABD aracılığınen Rusiye ve Ukrayina arasında cenkni bitirüv yollarınen bağlı üç taraflı muzakerelerniñ nevbetteki raundı keçti. Haber etilgenine köre, bu körüşüv neticesinde eyyetler cenk esirlerini deñişüv añlaşmasını yaptı – soñki beş ayda ilk deñişüv oldı.
ABD prezidentiniñ mahsus vekili Steve Witkoff fevralniñ 4-nde ve 5-nde olğan munaqaşalarnı "turğun barışıq içün şaraitler nasıl olacağına dair tam" dep adlandırdı. O, eyyetler eñ yaqın aftalarda üç taraflı muzakerelerni devam ettirmege añlaştı, dep haber etti. Amma nevbetteki körüşüvlerniñ yeri olaraq ABDni aytmadı.
Yanvarniñ 28-nde ABD devlet kâtibi Marco Rubio topraq meselesi çezilmey, dep ayttı. Rusiye Ukrayina Silâlı quvetlerinden zapt etmegen Donetsk vilâyetiniñ o qısmından ordusınıñ çıqarılmasını talap ete.
Yanvarniñ 23-nde ve 24-nde cenk başlağanından berli ilk sefer Abu-Dabide ABD, Rusiye ve Ukrayina eyyetleriniñ cenkni bitirmek içün üç taraflı muzakereleri olıp keçti. Nevbetteki basamağı fevralniñ 1-nde keçirilecek edi, amma soñra Ukrayina, ABD ve Rusiye arasında üç taraflı körüşüv fevralniñ 4-nde ve 5-nde olacaq, dep belli oldı.
Yanvarniñ 28-nde ABD devlet kâtibi Marco Rubio topraq meselesi çezilmey, dep ayttı. Rusiye Ukrayina Silâlı quvetlerinden zapt etmegen Donetsk vilâyetiniñ o qısmından ordusınıñ çıqarılmasını talap ete.
Yanvarniñ 25-nde Ukrayina prezidenti Volodımır Zelenskıy Vilnüs ziyareti vaqtında Kyivniñ topraq qararı deñişmey, uzlaşuvlarğa ise bütün taraflar azır olmalı, dep ayttı. O, ABD ile eki taraflı telükesizlik kefaletleri "100%" azır ve Kyiv imzalanmasını bekley, dep qayd etti.
Zelenskıy dekabr ayında topraq qararları meselesini Ukrayina halqı "saylavlar ya da referendum formatında" çezmeli, dep bildirdi.
Aynı vaqıtta Kreml Ukrayina içün ğarbiy telükesizlik kefaletlerini red etmege devam ete ve cenkte maksimalist maqsadları olğanını köstere, dep qayd etken edi ISW talilcileri.