Link açıqlığı

Saatnıñ esas haberi

«Ne vaqıt bilmeyim, amma planlarımız bar»: Zelenskıy kene Qırımnı keri almağa vade etti


Volodımır Zelenskıy
Volodımır Zelenskıy

Ukrayına prezidenti Volodımır Zelenskıy azat etilgen Harkiv vilâyetiniñ İzük şeerinde çıqışta bulunıp, Qırımnı kene Ukrayına kontroli altına qaytarmağa vade etti. Bu aqta Ukrayına devlet yolbaşçısınıñ matbuat hızmeti haber ete.

«Şimdilik, ne yazıq ki, işğalde olğan insanlarımızğa signal bermelimiz. Qırımdaki insanlarğa signalım: bizim insanlarımız olğanını bilemiz ve sekiz yıldan berli işğalde olğanları bu qorqun bir facia. Biz anda qaytacaqmız. Ne vaqıt bilmeyim. Amma planlarımız bar, ve biz anda qaytacaqmız, çünki bu bizim toprağımız ve insanlarımız», – dep bildirdi Ukrayına prezidenti.

Zelenskıynıñ qayd etkenine köre, Rusiye işğal etken Qırım sakinleri bu yılları «Rusiye propagandasınıñ basqısı altında buluna», ammma Ukrayına yarımadağa qaytqanda «qırımlılar Rusiye televideniyesi ve propagandasınıñ yalanını körecekler».

«Çünki aqiqat bizim tarafımızda olğanını bilemiz», – dep qayd etti Ukrayına prezidenti.

Ukrayına Silâlı quvetleriniñ Baş komandanı Valeriy Zalujnıy ve Ukrayına Yuqarı Radasınıñ milliy telükesizlik, mudafaa ve istihbarat meseleleri komiteti reisiniñ birinci muavini Mihail Zabrodskiy «Ukrinform» içün maqalesinde qayd etkenlerine köre, Qırım üzerindeki kontrol Ukrayına Silâlı quvetleriniñ Rusiyege qarşı cenkinde «çoq şey berecek muvafaqiyetniñ temeli ola». Bu maqalede Ukrayına komandanlığı Qırımdaki Rusiye arbiy obyektlerine 2022 senesi avgust ayında yapqan raketa darbelerini tanıdı.

Avgustnıñ 23-nde Ukrayına prezidenti Volodımır Zelenskıy «Qırım platformasınıñ» sammitini açıp, qırımlılarğa Ukrayına akimiyeti Qırımnı «mıtlaqa keri alacaq», dep ayttı.

Ukrayına prezidentiniñ ofis yolbaşçısınıñ mesleatçısı Mıhaylo Podolâk Qırım sakinlerini sığınaqlarnı teşkerip, Ukrayınanıñ «işğalden azat etüv areketleri» sebebinden suv yedeklerini azırlamağa çağırdı. Podolâk, Ukrayına prezidentiniñ ofisi işğal etilgen Qırım sakinleri içün tahliye marşrutlarını azırlay, dep bildirdi.

Kreml Kyivniñ «Qırımnıñ qaytarıluvı» aqqında beyanatını «Rusiyege qarşı dos-doğru bir telüke» dep adlandırdı.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG