Salavat (Başkortostan) şeeriniñ koloniyasında ceza çekken qırımlı Ruslan Zeytullayevğa, rus telekanalı “Rossiya 24” reportaj çıqarmaq içün keldi. Bu aqnf öz Facebook saifesinde adliyeci Emil Kurtbedinov haber etti.
““Rossiya 24” kanalı şiddetli rejim koloniyasında bulunğan Ruslan Zeytullayevğa keldi. Ecnebiy siyasiy mabüslerniñ Rusiyede ne qadar güzel baqılğanını köstermege istegen. Ruslan tasvir etti. Reportaj kösterilmedi,” – dep yaza Kurtbedinov.
Zeytullayev Rusiyede ve ilhaq etilgen Qırımda yasaqlanğan «Hizb ut-Tahrir» teşkilâtınıñ bölügini teşkil etkeninde qabaatlanıp mahküm etilgen edi.
2017 senesi iyül ayında Rusiye Yuqarı mahkemesi Zeytullayevniñ apis müddetini 15 yılğa arttırdı. Buña cevap olaraq Aqyar sakini açlıq ilân etti.
Ukraina Tış İşler Nazirligi müddetniñ arttırmasına qarşı narazılıq bildirdi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, maqsatqa bu irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
