Link açıqlığı

Saatnıñ esas haberi

Zapt etilgen ukrain arbiylerni 34 advokat imaye etecek (+video)


Ukraina Yuqarı Radasınıñ insan aqları vekâletlisi Lüdmila Denisova
Ukraina Yuqarı Radasınıñ insan aqları vekâletlisi Lüdmila Denisova

FSB Qırım yalısı yanında zapt etken ukrain arbiylerni 34 advokat mudafaa etecek dep bildirdi matbuat konferentsiyasında Ukraina Yuqarı Radasınıñ insan aqları vekâletlisi Lüdmila Denisova.

Onıñ aytqanına köre, olarnıñ bir qısmı - Qırımdan, başqası - Moskovadan. Arbiylerniñ bütün imaye masraflarını Ukraina devleti ödecegini de qoştı.

Deñizcilerniñ advokatları öz müşterilerinen yılnıñ soñuna qadar körüşmek kerek, mahkemede arbiyler siyasiy mabüs statusında israr etecek dep bildirdi uquq qoruyıcı taqımınıñ koordinatorı Nikolay Polozov.

Onıñ aytqanına köre, tevfiq etilgenlerniñ bu statusını tek Rusiye qabul etmey ve, advokat beyan etkeni kibi, Rusiye, Ukraina arbiyleri rusiye sıñırı bozdı dep üstünde körgezmeli mahkeme yapmaq istey. 2019 senesi yanvar ayında ukrainlerniñ tahqiqatı ve cezası uzatılacağında büyük ihtimal bar dep tahmin ete Polozov.

Matbuat konferentsiyasında “Berdânsk” kateriniñ başı Roman Mokrâkniñ advokatı İlya Novikov, deñizcilerge zarar ketirmemek icün şimdilik o ve zenaatdaşları mudafaa strategiyasınıñ tafsilâtını açıqlamaycağını bildirdi. Amma ukrain gemilerniñ atılğan yeriniñ koordinatlarına köre, rusiye arbiylerniñ buña aqqı yoq edi dep qayd ete Novikov.

Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.

Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».

Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.

Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.

XS
SM
MD
LG