Rusiye Federatsiyasınıñ Kemerovo vilâyetiniñ Belovo şeerindeki 44-nci qattı rejim cezahanesiniñ müdiriyeti qanunsız sürette mahküm etilgen qırımlı İvan Yatskinni tehdit ete ve horlay. Bunı Ukrayina Yuqarı Radasınıñ insan aqları vekâletlisi Dmıtro Lubinets bildirdi.
"Ebet, etap etilgen vaqıtta mabüsniñ ilâcları yoq oldı, Saratov SİZO-sında onıñ şeylerini harap ettiler ve telefon körüşüvlerini red ettiler. Buña itiraz bildirip, Yatskin 25 kün devam etken açlıqnı ilân etti. Bu vaqıt içinde o ekim tarafından bir kere bile baqılmadı. İlâclarınıñ qaytarılması ve tibbiy yardım kösterilmesi içün arizalarını cezahane hadimleri koyerip ata ediler", - dep yazdı Lubinets.
Onıñ sözlerine köre, ukrayinalı siyasiy mabüs cezasını çekken yerde uydurma qabaatlardan sebep artıq dört kere ŞİZO-ğa yollanğan.
Ombudsman, mabüslerniñ sabadan aqşamğa qadar kameralarda ayaqta qalmağa mecbur olğanlarını bildirdi. Bu ise trofik qotur ve ayaqları tonğan Yatskin içün iskencedir.
2021 senesi mayısnıñ 21-nde Rusiye nezaretinde olğan Qırımnıñ Yuqarı mahkemesi «devlet hainliginen» qabaatlanğan Qırım sakini İvan Yatskinge üküm çıqardı. Alla Hineviçniñ reisliginde qadılar kollegiyası İvan Yatskinni bir yıl sıñırlav ile 11 yıl sert apis cezasına mahküm etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
