Yaltanıñ Rusiye akimiyeti, şeer merkezinde yol areketiniñ shemasını deñiştirmege ve maşnalar içün qapalı cayav yollarınıñ sayısını arttırmağa istey. Memuriyet başınıñ muavini Aleksey Çelpanovnıñ fikrince, bu areketlernen şeerniñ tarihiy qısmını naqliyattan boşatmaq ve qoşma parkovka yerlerini yaratmağa imkân peyda olur.
“Yañartılğan shema, hususan, “Yalta” musafirhanesine Drajinskogo soqağından bir taraflı yol areketni közde tuta, Ruzvelta ve İgnatenko soqaqlarını ise, esasen - cayav yapmaq, amma aynı vaqıtta şlagbaum keçitinen parkovka yerleriniñ ayırılması niyetlenile”, - dep yaza Çelpanovnıñ sözlerinden şeer memuriyetiniñ matbuat hızmeti.
Bundan ğayrı, o, deñişmeler Sverdlov soqağınıñ başında, Rudanskogo ve Drajinskogo soqaqları arasında yol areketi eki taraflı yapılacaq yerde, da olacağını qoştı.
Daa, memuriyet başınıñ aytqanına köre, İgnatenko soqağını çeşmelernen yaraştırmağa imkân bar.
Çelpanov, “Spartak” turağı yanında da cavav qısmını bollaştırmaq istegenlerini de bildirdi.
“Çiçek bazarınıñ avuştırılması içün saiplerinen aldın añlaşma endi bar, turaq yanında meydançıq ise abadanlaştırılacaq ve keñleştirilecek”, - dedi o.
