Ukrayına Silâlı quvetleri Herson vilâyetiniñ beş mesken yerini Rusiye ordusından temizledi. Vısokopillâ aqqında bundan evel haber etilgen edi. Bu aqta «Yug» Ukrayına operativ komandanlığı haber ete.
Vısokopillâdan ğayrı, Novovoznesenske, Biloğirka, Suhıy Stavok ve Mırolübivka Ukrayına kontroli altında bulunalar.
«O yerler temizlendi ve qoşma tedbirler devam ete, amma bu mesken yerlerniñ ealisi Ukrayına yurisdiktsiyası altındadır», – dep qayd etti «Yug» operativ komandanlığınıñ spikeri Natalâ Ğumenük.
Sentâbrniñ 4-nde Herson vilâyetiniñ şimalindeki Vısokopillâ qasabası Ukrayına Silâlı quvetleriniñ kontroli altına qayttı, dep haber etildi.
Rusiye Telegram kanalları cenkni aydınlatıp, Rusiye ordusı mesken yerni terk etmege mecbur edi, dep bildirdi.
Soñki bir qaç künde Ukrayına arbiyleri Harkiv vilâyetinde zapt etilgen aman-aman bütün topraqlarnı azat etip, Rusiye ile sıñırğa çıqtı.
Talilciler bunı Moskvanıñ Ukrayına cenki başlağanından eñ büyük yutquzuv dep adlandırdı. Rusiye arbiyleri buña «yañıdan gruppalav» deyler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
