Ukrayına Nazirler Şurasınıñ hususiy allarda ğayıp olğan şahıslarnıñ meseleleri vekâletlisi Oleg Kotenko bildirgenine köre, al-azırda elâk olğan 540-tan çoq Ukrayına imayecisini qaytarmağa imkân oldı.
«Qızıl Haç halqara temsilciligi vastasınen Rusiye Federatsiyasınıñ tarafınen bağ qurmağa imkân oldı. İstilâcınen muzakereler zor oldı, amma elâk olğan 541 imayecimizni qaytarıp oldıq. 428 ceset Mariupolden ketirildi, 300-den çoqu – «Azovstal» imayecileri. Donetsk, Zaporijjâ, Herson, Harkiv, Luğansk yönelişlerinden – er yerden – elâk olğanlarnı qaytaramız», – dedi Kotenko.
Onıñ tarif etkenine köre, Ukrayına elâk olğan imayecileri olğan yerlerni Rusiye tarafına bildire.
«Olarnı almaq kerekler, ve soñra deñişemiz. Amma sessizlik ilân etilse de, Rusiye Federatsiyası cenk areketleri alanına barmağa istemey. Vaqtınca işğal etilgen topraqlarda bile imayecilerimizniñ cesedlerini almaları içün añlaşmaq zor ola. Ölgen asker sayısı çoq olğanı içün rusiyeliler elâk olğanlarını alamay», – dep qayd etti o.
Kotenko bildirgenine köre, ğayıp olğan ya da elâk olğan Ukrayına imayecileriniñ tuvğanlarınen toqtamayıp bağda bulunalar.
«Reintegratsiya nazirligi elâk olğan ve ğayıp olğanlarnıñ tuvğanlarınen 20-den çoq körüşüv keçirdi. Tuvğanı elâk olğan insanğa cesedini ne içün qaytarıp olamağanımıznı añlatmaq zor ola», – dep qoştı Kotenko.
İyünniñ 1-nde Ukrayına İç işler nazirligi ğayıp olğan ve elâk olğan, esir alınğan Ukrayına imayecileriniñ tuvğanlarından muracaat qabul etip başladı.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
