Kreml nezareti altındaki Kezlev akimiyeti, bu yılnıñ sekiz ayında 950 biñ turistnıñ şeerni ziyaret etkenini ve yıl soñuna qadar bu raqam bir millionğa köterilecegini iddia ete. Bunı şeer memüriyetiniñ rusiye başı Andrey Filonov haber etmekte.
“Mevsim rekordlıdır. Sentâbr 1-ine itibaren biz 950 biñ turistni qabul ettik. 2014 senesinden 2018 senesine qadar, raatlanıyıcı sayısı aman-aman üç qat arttı. Yılnıñ soñunace bir million turistten çoq olacaq. Böyle raqamlar atta ukrain degil, sovet devrine ait edi”, - Filonovnıñ sözlerinde yaza “Novosti Krıma”.
Daa evel, Kreml nezareti astındaki Qırım turizm ve kurort Nazirliginiñ malümatına köre, işğal etilgen Qırım yılnıñ başından 5,6 million turist qabul etti, bu, 2017 senesine nisbeten, üçte bir kerege çoqça.
Raatlanıyıcılarnıñ sayısı aqqnda mustaqil menbalardan malümat yoq.
Avgust 21-inde Ukraina Devlet sıñır hızmetiniñ Azaq-Qaradeñiz bölgesiniñ idaresi, Qırımnıñ rusiye akimiyeti qıta Ukrainadan yarımadağa barğan raatlanıyıcılarnıñ sayısını qabartalar dep Qırım.Aqiqatqa haber etti.
Daa evel Rusiye ve Qırım matbuatları, turizm komitetiniñ başı Aleksey Çernâknıñ sözlerinden, avgustnıñ başınace Qırımda 830 biñ Ukrainanıñ qıta qısmından kelgen turist raatlandı dep bildirgen edi.
