Qırımda «qırımlı musulmanlar davası» boyunca apiske alınğan vatandaş jurnalisti Vilen Temeryanov Aqmescitteki psihiatrik hastahanede buluna. Advokatı Marlen Halikovnıñ bildirgenine köre, Temeryanov mahkeme ekspertizasından keçe.
Temeryanov Rusiye mahkemesiniñ qararına köre 20 künden berli hastahanede buluna ve tezden tahqiqat izolâtorına qaytacaqtır.
Avgustnıñ 11-nde Rusiye FSBsiniñ hadimleri Canköy rayonınıñ Frayleben (Volnoye) qasabasında «Qırım birdemligi» ve «Grani.ru» mühbiri Vilen Temeryanovnıñ evini tintti. Onı Rusiyede yasaqlanğan «Hizb ut-Tahrir» İslâm siyasiy firqasında iştirak etkeninde qabaatladılar. Rusiye quvetçileri o künü tintüvler vaqtında beş qırımtatar faalini apiske aldı.
Rusiye kontrolindeki Aqmescitniñ Kiyev rayon mahkemesi tutulğan qırımtatarlarnı apiske aldı.
«KrımSOS» aq qorçalayıcı teşkilâtı avgustnıñ 11-nde Qırımda tintüvlerden soñ tutulğan qırımtatarlarnı siyasiy mabüs dep adlandırdı.
Ukrayına prezidentiniñ Qırım Muhtar Cumhuriyetindeki temsilciligi qırımtatarlarnıñ evlerinde keçirilgen tintüvlerni takbih etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
