Qarasuvbazar yanında "Tavrida" trassasında "Reno Megan" ve ZİL 130 gaz taşıyıcısı çatıştı. Qırım Devlet Avtomobil İnspektsiyası bildirgeni kibi, bir adam elâk oldı ve bir adam yaralandı.
"Bugün, tahminen saat 6:20, Aqmescit - Keriç avtomobil yolunda "Reno Megan" maşnasınıñ aydavcısı bilinmegen sebepler içün qarşı yol yolağına çıqtı ve ZİL maşnasına uruldı. Şimdi bilingenine köre, "Reno" aydavcısı hastahanede, yolcusı ise elâk oldı", - dep bildirdi "Krıminform"ğa müessisede.
Rusiye FVN-niñ Qırım idaresine köre, yol qazası Qarasuvbazardan 10 kilometr uzaqlığında oldı, yol areketine mania yoq.
"Vkontakte" içtimaiy ağnıñ qullanıcıları qaza yerinden videolarnı derc etti. Anda yengil maşnanıñ ögü ezilgeni körüne. "Propan" yazısınen ZİL yük maşnası qazadan soñ avdarıldı.
Qırımlı qurtarıcılarnıñ bildirgenine köre, Qırımda ciddiy yol qazalarınıñ sayısı arttı. Qırımda 2019 senesiniñ birinci üç ayında keçken yılğa baqqanda bir buçuq qat ziyade aydavcı mesüliyetke çekildi.
