Ermeni Bazarnıñ (Armânsk) rusiye akimiyeti, keçken yıl “Qırım titanı” zavodınıñ ekologik qazasınen bağlı evelden bilinmeycek vaziyetlerge azırlana. Bu aqta Kreml nezaretindeki yarımada başı Sergey Aksönov Facebookta bildirmekte.
“Bugünde-bugün, ava sıcaq olsa bile, keçken yıl olğan kibi zararlı buvlanuvlar olmamaq kerek. Amma er alda, ealini haberdar etmek içün tedbirler yapıla. Bütün taze haberler şeer akimiyetiniñ saytında derc etilmeli. Bunen beraber, beklenilmeycek allarda yapılacaq areketlerniñ planı da tizilmeli”, - dep yazdı Aksönov.
Onıñ aytqanına köre, aprelniñ 1-inden başlap Ermeni Bazarda avtomatik nezaret noqtası test rejiminde çalıştırılacaq.
Martnıñ başında Qırımnıñ şimalinde – Ermeni Bazarda ve Krasnoperekopskta – yañı himiyeviy taşlantılar qayd etildi.
Ermeni Bazarda oktâbrniñ 20-nde «Qırım titanı» zavodı çalıştırmağa başladı. Onıñ işi avgustnıñ 23-nden 24-ne keçer gecesi taşlantılardan sebep toqtatılğan edi. Qırım akimiyeti bulaşuv sebebi «Qırım titanı» qullanğan ekşilik havzularından çıqqan buvlanuvı ola, dep bildirdi.
Kyiv, Qırımda himiyeviy taşlantılarnıñ avağa atılmasına Rusiye arbiyleri sebepçi olğan dep iddia ete, çünki olar idman yapqanda titan ve soda zavodlarınıñ taşlantılarına ateş açqan edi.
Qırımnıñ rusiyeli başlığı Sergey Aksönov, Ermeni Bazardan (Armânsk) mektep çağına yetmegen ve mektep çağındaki balalarnı avanıñ bulaşuvı içün Qırım sanatoriylarına yollacaqları aqqında haber etti.
«Qırım titanı» zavodı daa 1971 senesi işinibaşladı, 2000 senelerniñ başında ise, Dmıtro Firtaşnıñ Groop DF şirketiniñ nezareti altına keçti. İşhaneniñ esas yönelişi - titan dioksidiniñ istisalı. Titan dioksidi - lak, boya, rezina, plastmassa işlep çıqaruvında ve daa çoq başqa saalarda qullanılğan madde.
2014 senesi, Qırım işğalinden soñ, Dmitriy Firtaş, zavod idare etilmesiniñ terkibini deñiştirdi. Oktâbr ayında Groop DF, «Qırım titanı» şahsiy aktsiyalı şirketini (ŞAŞ) «Titan yatırımları» açıq aktsiyalı şirketine (AAŞ) berdi. 2015 senesi «Qırım titanı» ŞAŞı «Ukrainian Chemical Products» adını deñiştirdi.
